Sichithiwe isinqumo sokumiswa kuka-Apleni
INKANTOLO enkulu iNorth Gauteng Court seyiveze ukuthi isinqumo sokumiswa kowayenguMqondisi Jikelele woMnyango wezaseKhaya uMnuz Mkuseli Apleni akukho emthethweni.
Inkantolo ithe obenguNgqongqoshe wezaseKhaya, uSolwazi Hlengiwe Mkhize ubengenawo amandla okumisa u-Apleni.
Uye enkantolo emuva kokuthi emiswe nguSolwazi Mkhize obengungqongqoshe nosekungene uNkk Ayanda Dlodlo esikhaleni sakhe.
UMnyango wezaseKhaya wakhipha isitatimende uveza ukuthi uSolwazi Mkhize umise u-Apleni. Bathi umiswe kusuka ngoSepthemba 18 nonyaka. Sagcina singacacanga isizathu sokumiswa kwakhe.
U-Apleni ubelokhu ekugcizelele ukuthi umuntu ongammisa emsebenzini ngumengameli wezwe, hhayi ungqongqoshe.
Ngesikhathi emmisa ngenyanga edlule, ungqongqoshe akazange asibeke isizathu.
U-Apleni wabeka izinsolo zokuthi ungqongqoshe ubefuna ukumsusa ukuze akwazi ukukhokhela elinye lamacala elalibekwe umnyango engasekho ngoba yena wayesiphikisile isinqumo sokuthi kwenziwe lokho.
Isiphikisa isinqumo sokumiswa kwakhe izolo, inkantolo ithe ungqongqoshe wezaseKhaya “wayengenawo amandla okumisa umgilwa nokuthi isinqumo sokummisa sasiphambene nomthetho.”
Inkantolo inike ungqongqoshe umyalelo wokuthi akhokhele izindleko zesicelo. U-Apleni uthe isinqumo senkantolo sisho ukuthi usengabuyela emsebenzini. UMnyango wezaseKhaya bewungakakuvezi ukuthi uzimisele yini ukuphikisa isinqumo senkantolo.