Imithi yokugqiha kubanjwa abenkunzi
ABHADANYWE nemithi okusolakala ukuthi eyokugqiha amadoda ayisikhombisa asolwa ngokuba ngongqondongqondo ekubanjweni kwenkunzi ezitolo, okudlange KwaZulu-Natal.
La madoda akhalelwe ngamasongo kaSigonyela ngoMsombuluko edolobheni eNquthu emuva kokuba amaphoyisa elunywe indlebe ngawo.
Ngokuthola kweSolezwe, laba balisa bebehamba ngezimoto ezahlukene ngesikhathi ezakwadalawane zibathelekela besadla ukudla kwasemini kuleli dolobha.
Kuthiwa abasolwa abayisithupha bebesendleleni beyobamba inkunzi isitolo sakwaBoxer esiseNkandla, badlula eNquthu ukuyohlola isimo ukuthi sihamba kanjani ngenhloso yokubuya bazoqola.
Imithombo ithi bebehlela ukubuya kuBoxer wakule ndawo uma sekuholwa impesheni ngenyanga ezayo.
Phakathi kwezinto ezitholakale kubona kubalwa izibhamu nezinhlamvu namabhodlela emithi, okusolakala ukuthi bayisebenzisela ukuthi bangabanjwa uma sebegila imikhuba.
Kuthiwa abakwaSidlodlo babambe iqembu lokuqala okuyilona eligonyuluke konke lakhipha nabanye elihamba nabo. Ngesikhathi amaphoyisa ebapheke ngobhojwana ngemibuzo bahlanze iqiniso njengomuntu efa, besho amaqhinga abebelele kuwona okubamba izitolo.
Umthombo uthe amadoda agcine ekhipha ngisho ubhongoza owaphethe ebugebengwini ababenza isifundazwe sonke.
Uphenyo lwamaphoyisa luwaholele eKatlehong, eGoli lapho kubanjwe khona omunye wabasolwa ephethe isibhamu esingekho emthethweni, kwavulwa icala esiteshini sakhona. Okhulumela amaphoyisa KwaZulu-Natal uLieutenant Colonel Thulani Zwane, ukuqinisekisile ukuboshwa kwabasolwa, wathi bayamaniswe nezinye izigameko zokubanjwa kwenkunzi eNquthu naseNewcastle.
‘’Sisazoqhubeka nokuhlola kabanzi umlando wabasolwa ukubheka ukuthi awekho yini amanye amacala abathinteka kuwona. Bazolinda ukwethweswa amacala okubamba inkunzi bese bevela enkantolo maduze,’’ kusho uZwane.
Obambe kwesomkhuzi wamaphoyisa esifundazweni uMajor General Bhekinkosi Langa uncome amaphoyisa aseNquthu ngokubopha abasolwa.