Inkosi ifuna unwetshwe umgwaqo oya eBuhleni
INKOSI yamaQadi uMqoqi Ngcobo ifuna kunwetshwe umgwaqo ongenela eBuhleni, ukunciphisa izingozi nesiminyaminya esidaleka uma kuyinkonzo yamaNazaretha.
UNgcobo ubeyingxenye yomkhankaso kahulumeni iSukuma Sakhe eNanda, lapho bekuqiniswa ezokuphepha emgwaqweni. Uthe kuyamkhathaza ukwanda kwezingozi ezithinta isizwe samaQadi njengoba zimbili ezenzeke nonyaka.
“Umgwaqo oya eBuhleni awunazo izinciphisajubane ekubeni abashayeli bayagijima. Kwenye ingozi yanonyaka, okushone kuyo abaningi, sathola ukuthi itekisi yehla emgwaqweni indiza, ibalekela amaphoyisa. Okubi ukuthi kunezikole eduze kwalo mgwaqo. Singajabula uma uhulumeni engasheshisa ukufakwa kwezinciphisajubane, enze neminye imigwaqo engenela eBuhleni ukugwema isiminyaminya,” kusho uNgcobo.
Umgwaqo akhuluma ngawo uphakathi koMzinyathi neNgcongcweni lapho ngoJuni nonyaka kwaphaphalaza itekisi kwashona kuyo abane. Ngenyanga edlule kuphinde kwashona ababili emgwaqweni ofanayo. Ngomunye unyaka kwaphaphalaza iloli yashayisa ababehamba ngezinyawo eduze kwesikole iVusukukhanya Primary.
UMnuz Bonke Chili oyikhansela ku-ward 3 eMzinyathi, uthe ngonyaka odlule emuva kokhetho lwango-Agasti ahlukaniswa amawadi, okwenza umgwaqo onenkinga ungabe usaba ngaphansi kwakhe. Uthe ngesikhathi behlanganisiwe wayikhuluma eyezinciphisajubane, eziqalile ukufakwa kwenye ingxenye yomgwaqo. Ukuvumile ukuthi umgwaqo udinga ukusukunyelwa ngoba uyabaqeda abantu.
Izolo ithimba obekukhona kulo amaphoyisa neNhloko yoMnyango wezeziMali KwaZulu-Natal, uMnuz Simiso Magagula, liqale ngesivimbamqwaqo eMtshebheni. Kubuye kwayobhekwa nomgwaqo uP100 owakhiwayo, ohlanganisa Inanda neNdwedwe. Lo mgwaqo ungu-30 km ubude. Sekusele kancane uphothulwe. Inhloso yokwakhiwa kwawo ukwenza kube lula ukuhlanganisa lezi zindawo njengoba indlela ibijikeleza. Bangu-50 abaqashwa unyaka nonyaka ukuba yingxenye yohlelo lokulungiswa kwalo mgwaqo.
Umkhankaso weSukuma Sakhe izolo ubuyingxenye yekhwelo elihlatshwe uNdunankulu wesifundazwe uMnuz Willies Mchunu, ojube ongqongqoshe ukuhambela omasipala abahlukene esifundazweni. UNgqongqoshe wezokuThuthukiswa koMnotho uMnuz Sihle Zikalala ubeseJozini wabuye waba nesithangami nabezindaba esiteshini samaphoyisa eNgwavuma.