Bafuna kusheshiswe ukwehlisa imishanguzo
INHLANGANO yezempilo ifuna lusheshe uhlelo lokushintsha imithetho yakuleli esiholele ekutheni imishanguzo imbe eqolo.
Le nhlangano eyinhlanganisela yezinhlangano ezilwela eziguli, eyaziwa ngeFix the Patent Laws Coalition (FTPL), ifuna elakuleli liqinisekise ukuthi imishanguzo itholakala ngemali encane.
NgoLwesibili, amalungu ale nhlangano eyinhlanganisela yezinhlangano okubalwa kuzo iTreatment Action Campaign (TAC), iMédecins Sans Frontières/Doctors Without Borders (MSF), iCancer Alliance, amashele emahhovisi oMnyango wezoHwebo neziMboni, ePitoli eyothula izincomo zawo ngomthetho sivivinywa obhekele ukunciphisa inani lemishanguzo owethulwe yilo mnyango ngo-Agasti nonyaka.
Lo mthetho-sivivinywa uzosiza ekuvimbeleni izinkampani ezinkulu ezikhiqiza imishanguzo ukuthi kube yizo zodwa ezihlinzeka imishanguzo kuleli.
Lokhu kuzonika elakuleli ithuba lokuthola imishanguzo eshibhile kwezinye izinkampani.
I-FTPL imashele emahhovisi omnyango ngenhloso yokukhombisa ukuweseka umthethosivivinywa.
Iveze ukuthi iyahambisana nokuphasiswa kwalo mthethosivivinywa njengoba lokhu kuzokwenza ukuthi iziguli zikwazi ukuthola imishanguzo eshibhile, ikakhulu iziguli ezinezifo ezibucayi njengomdlavuza.
Iphinde yakhipha nombiko okhuluma ngokumba eqolo kwemishanguzo yomdlavuza eNingizimu Afrika.
Bathe amanye amazwe okubalwa kuwo i-India ayithola ngemali encane kakhulu imishanguzo.
Lo mbiko uveze ukuthi umshanguzo womdlavuza wegazi i-lenalidomide ubiza uR882 000 ngonyaka kuleli kodwa ubiza imali engaphansi kukaR32 000 ngonyaka e-India.
UNkk Salome Meyer weCancer Alliance uthe kubukeka sengathi uMnyango wezoHwebo neziMboni usubonile ukuthi sekuyisikhathi sokubeka impilo yabantu phambili.
Phambilini lezi zinhlangano bezisola lo mnyango ngokuqhakambisa umnotho wezinkampani ezikhiqiza imishanguzo.
“Umbiko (ngokumba eqolo kwemishanguzo yokwelapha umdlavuza) ukhombisa ukuthi ibaluleke kanjani le nto, yingakho kubalulekile ukuthi sikhombise ukuweseka uMthethosisekelo,” kusho uNkk Meyer.
Uthe leli yithuba elibalulekile lokuthi iNingizimu Afrika yenze into engalandelwa ngamanye amazwe.
“Sikulungele ukucindezela iPhalamende ukuthi liwenze ube khona lo mgomo ngonyaka ozayo,” kusho uNkk Meyer.