Umnyango uhambisa izincwadi ulungiselela unyaka ozayo
IZIKHULU zoMnyango wezeMfundo KwaZulu-Natal zihlose ukuthi kuphele le nyanga zibe sezifikile zonke izincwadi zokufunda zangonyaka ozayo.
Lo mnyango umatasa uhambisa izincwadi ezikoleni zesifundazwe ukuze kuthi kuvulwa izikole ngoJanuwari wonyaka ozayo kube kusha umsebenzi wokufunda nokufundisa.
UDkt Enock Nzama, inhloko yomnyango wezemfundo esifundazweni uthe kumele kuphele le nyanga sebephothulile ukuhanjiswa kwezincwadi ezikoleni.
Uthe ibalelwa kuR326 million imali yokuthenga izincwadi esifundazweni.
“Sesiyikhokhile imali yokuthenga izincwadi kumanje ziyahanjiswa ezikoleni. Sifuna ukuthi uma kuvulwa izikole kungabi nokuphazamiseka njengoba izincwadi sizihambisa manje kungakavalwa nezikole,” kusho uNzama.
Umbiko womnyango othulwe esiShayamthetho sesifundazwe muva nje uveza ukuthi ezikoleni ezingu-5 850 zesifundazwe, zingu-3 121 ezithengelwa umnyango izincwadi, ezingu-2 729 ziyazithengela.
Zingu-4 225 izikole ezithenge izincwadi kanye kanye okwenza ukuthi kube nesaphulelo.
UMnuz Thami Mbanjwa, umqondisi obhekele ukusabalalisa izinsizakufunda emnyangweni, uthe nakanjani kumele kuphele le nyanga zonke izincwadi sezifikile ezikoleni.
Uthe zonke izincwadi zifikela esikhungweni esiseManzimtoti, bese zithunyelwa ezikhungweni ezincane ezisabalele isifundazwe sonke.
“Kulezi zikhungo ezincane sisuke senzela ukuthi kube lula ukuthi izincwadi zifinyelele ezikoleni. Izindawo ezinalezi zikhungo iseMpangeni, Ixobho, Ladysmith, Vyrheid naseMkhuze,” kusho uMbanjwa.
Uthe inkampani eyathola ithenda yokusabalalisa izincwadi, iNdabase Printing iyona eyenza lo msebenzi iphinde iqashe osomabhizinisi bendawo.
Kuke kwaba nokukhala ngokuthi umnyango awuzikhokheli ngesikhathi izinkampani ezenza umsebenzi nawo.
Selokhu le nkampani yathola lo msebenzi eminyakeni edlule akukaze kutholakale izincwadi zilahliwe njengoba kuke kwenzeka eLimpopo.
“Ngasohlangothini lo mnyango sithola ubufakazi bokuthi zonke izincwadi zihambile. Isikole nesikole siyasayina ukuthi sizitholile izincwadi ezifanele ngokuletha ama-invoice,” kusho uMbanjwa.