Asiyeke ukumbandaza ngobugebengu
NGOLWESIBILI kuphinde kwazwakala ezinye izindaba ezimbi njengoba izibalo zobugebengu zaphakathi kukaMashi 2016 no-Ephreli nonyaka ziveze ukuthi inkinga yobugebengu isenkulu ezweni lethu.
Abantu bayagetshengwa emakhaya, emgwaqweni, ezitolo kanti nobugebengu obuhleliwe budlangile njengoba nosomabhizinisi bebhekene nenselelo efanayo futhi nenkohlakalo idla lubi kuhulumeni nasezinkampanini ezizimele.
Ubugebengu obunodlame buthinta kwasani, ikakhulukazi abesifazane nezingane.
Nakuba ngokwezibalo izinga lobugebengu lilonke lehlile ngo-1.8% kodwa akuyona ngisho into okufanele ize iphathwe leyo ngoba iqiniso ukuthi ubugebengu budlangile kuleli futhi kunokuthi bunciphe buyakhula.
Ubugebengu sebusenza sihlale sithuka izanya ngisho emakhaya. Nasemigwaqweni yiso leso, akukhathaleki ukuthi uhamba ngemoto noma ngezinyawo, uhlale ujeqeza ukuthi iwindi aliphahlazwa, awuphucwa imoto noma akekho yini okuhlwitha isikhwama noma iselula.
Ngisho ezikoleni kunodlame, akusekho ukuthi kungcono uma ingane isesikoleni ngoba iphephile.
Kulezi zinsuku udlame lukhona nasezikoleni futhi izidumbu ziyaphuma izingane zigwazana noma zidubulana.
Nabanye othisha bayazigilamkhuba ezidlwengula izingane.
Kunezinto okumele zenziwe nguhulumeni njengokuqikelela ukuthi kuqashwa amaphoyisa anele, aqeqeshwa ngokwanele futhi anikwa izinsiza ezanele ukuze abhekane nezinselelo zomsebenzi wawo.
Kumela abepolitiki bayeke ukugxambukela emsebenzini wamaphoyisa nokulwa izimpi zabo ngezinhlaka okufanele zivikele umphakathi.
Nathi singumphakathi sinelethu igalelo kule mpi edlangile. Kumele sibheke ukuthi yini eyenza izingane zethu zibe nolaka nodlame.
Asiyeke ukufukamela izigebengu emiphakathini yethu nokuthenga izimpahla ezebiwe.
Izwe lethu lihle futhi linothile kodwa ubugebengu ngenye yezinto ezilonayo, lena akuyona into okufanele silokhu simbandaza ngayo sithi ihaba ngoba kuliwa nohulumeni we-ANC.