Angincikile kumyeni wami: Sma Mathibeli
AKANGENANGA emabhizinisini ngoba esegane usomabhizinisi owesifazane ozakhele udumo kuthelevishini nasemsakazweni.
UNkk Sma Mathibeli, uMaMbatha, ongumdidiyeli wezinhlelo kuKhozi FM, uthe wayevele enombono wokungena emabhizinisini. UNkk Mathibeli, owaqala ukulingisa kwiYizo Yizo ebizwa ngoMantwa, uthe ukulingisa kwakuyindlela yokuvula eminye iminyango kwezamabhizinisi futhi akaziboni eqala phansi eyolingisa. Ngo-2014 ungene kwelinye izinga lempilo eshada noMnuz Calvin Mathibeli ongusomabhizinisi. Kumanje uNkk Mathibeli uyisikhulu esiphezulu yeCalvin and Family Group, okukhona kuyo nenkampani yezokuxhumana eyenganyelwe nguyena. NgoMgqibelo ozayo uzobe eyisikhulumi emcimbini wabesifazane eCoastlands Hotel, eMhlanga.
Umcimbi uhlelwe yinhlangano iWonderfully and Fearfully Made Divine Woman, esungulwe nguNkk Zethu Sibani.
“Ngifuna ukutshela abesifazane ukuthi ngaphambi kokushada nosomabhizinisi bengiwuSma okwazi ukuzenzela futhi ongumholi.
“Abantu banomqondo wokuthi abesifazane bashada nosomabhizinisi ngoba befuna ukungena emafutheni. Mina ngibe nomthelela omkhulu ekutheni amabhizinisi ethu nomyeni wami aphumelele. Ngiyaziqhenya ngokuthi okuningi sikuqale naye,” kusho uNkk Mathibeli.
UNkk Mathibeli ophinde abe nendawo yokudla i-Unique Cafe asizana kuyo nomyeni wakhe, uthe kukhulu asazokwenza ukukhombisa abantu ukuthi akancikile kumyeni.
“Kungiphatha kabi ukuthi kunabantu abacabanga ukuthi abesifazane namanje baphumelela ngoba uhulumeni ubavulele kakhulu amathuba. Abesifazane vele banamandla futhi bangabaholi. Empilweni yami ngazifundisa ukuba ngumholi nokungahluleki. Kube yibhansela nje ukuthola indoda enombono webhizinisi ngoba sesiyakwazi ukufeza amaphupho ndawonye. Akuyona indoda kuphela eyenza izinto zenzeke, yilokhu engifuna ukukutshela abesifazane,” kusho uNkk Mathibeli.
Le ntokazi eke yadlala nakwiZone 14, ithe uma ibuyela kuthelevishini iyobe yenza okukhulu kunokulingisa. Iphupho layo wukuba nenkampani ekhiqiza imidlalo nezinhlelo zethelevishini. UNkk Mathibeli uke wahlabana ngendondo yeBest Young Achiever kumaMTN Radio Awards ngo-2011. Lokhu ithe kuwubufakazi bokuthi ubevele esebenza kanzima kukho konke akwenzayo.
Uzishaya isifuba ngenxa yokuthi amabhizinisi ahamba kahle, ikakhulukazi inkampani yezokuxhumana ebisanda kuba kwabanye abebehlela i-Essence Festival eThekwini. Nonyaka umangaze abalandeli bakhe eveza imoto entsha iPorsche Panamera ezinkundleni zokuxhumana, okukhomba ukuthi kumhambela kahle. Uyaqhubeka nokudidiyela uhlelo lwantambama iWoza Nabangani Bakho phakathi nezinsuku neSigiya Ngengoma ngoMgqibelo kuKhozi FM.
Emcimbini wabesifazane uzobe eshiyelana inkundla nombhali wezincwadi uMbali Gcabashe, uNkk Poppy Khoza, uDkt Cebi Sibisi, uNkk Mpume Myeni, uZindlela Madela noSam Xulu. UNkk Sibani uthe inhloso yomcimbi wukuhlanganisa abesifazane abasemkhakheni ehlukene ukukhuthaza abanye.
“Laba besifazabe abazange bavele baphumelele nje kodwa badlulile ezinkingeni. Kukhona okwehlukile kuwo wonke owesifazane, yingakho kumele bacobelelane ngempilo yabo,” kusho uNkk Mathibeli. Imininingwane yamathikithi iyatholakala ku-Instagram nakuTwitter @Lady Zeei.