Incwadi ngomlando waKwaZulu
UFUNA ukuqeda ukuhlanekezelwa komlando waKwaZulu umbhali wencwadi athi izovula abaningi amehlo.
UNksz Shalo Mbatha (59) waseSoweto, eGoli usanda kukhipha incwadi ethi UZulu eyamukelwe ngesasasa njengoba esemenywe nasemisakazweni ehlukene. Lo mbhali othi uchithe iminyaka eminingi ekudingisweni uthe akasafuni ukukhuluma ngakho ngoba usekuthatha njengento edlulile. Ukuhlala ekudingisweni kumenze wabuyela kuleli enemibuzo engaphenduleki ngomlando wabamnyama. Kumthathe iminyaka engu-20 ukuqoqa ulwazi ngomlando oqukethwe encwadini.
“Indodana yami isaneminyaka eyisikhombisa yayijwayele ukuthi abamnyama bangamagwala ngoba baphucwa abelungu yonke into. Bekuthi noma ngizama ukuchaza ukuthi wubandlululo olwalimaza abamnyama ingane ithi kusho ukuthi ubugwala obenze abamnyama bahluleka ukunqoba abelungu. Ngazibuza ukuthi uma ingane yami inale mibuzo engihlulekayo ukuyiphendula, mingaki eminye imindeni enale nkinga,” kusho yena.
Ngo-2007 uNksz Mbatha walaxaza umsebenzi wokuba yintatheli waqhubeka nokuhlanganisa incwadi. Uthe waqala ukuqoqa umlando ngeLembe ngaphambi kokubheka amanye amakhosi. Uhambele izindawo ezehlukene KwaZuluNatal ehlala emizini yabantu ukuze axoxe nabantu, amakhosi namabutho. Uxoxe nezazi zamasiko nomlando okubalwa uReggie Khumalo, uThokozani Nene noMntwana uGideon Zulu abangasekho noSolwazi Sihawu Ngubane.
“Kuningi okungimangazile sengithola amaqiniso ngomlando wamaZulu. Kunesithombe esibi esibekwa ngeLembe nesizwe salo okungathi asihlakaniphile ngenxa yokuthi vele umlando ubhalwe abelungu. Ngithole ukuthi iLembe lalibathanda abesifazane futhi belingayi empini lingatholanga isibusiso kubona,” kusho uNksz Mbatha.
Uthe indlela alwenze lwajula ngayo ucwaningo lwakhe akekho ongamphikisa ngokubhalwe encwadini. Uyibhale ngesiZulu ngamabomu ngoba efuna ukubuyisa isithunzi solimi namasiko. Ukholwa wukuthi izodala nobumbano esizweni samaZulu ngoba iphethe amaqiniso.
“Kwadingeka ngiboleke imali ukuze incwadi yami iphumelele. Yachithwa yizinkampani ezinkulu zokushicilela ezingibuze ukuthi yikuphi okusha engizokubhala ngomlando wamaZulu. Okumangazayo wukuthi abelungu babuza ukuthi kungani ngiyibhale ngesiZulu futhi angizimisele ukuyitolika ngesiNgisi,” kusho uNksz Mbatha.
Uthe ufisa ukuthi uMnyango wezeMfundo wenze indlela yokuthi ifundwe ezikoleni. Usethole nesicelo sokuthi ibhalwe nangeBraile ukuze nabangaboni bayifunde. Kuyamjabulisa ukuthi uthole nesibusiso seSilo samaBandla kule ncwadi. Ngenxa yokungabatholi abashicileli uthe incwadi uyazidayisela ikakhulukazi kuFacebook lapho enabalandeli abaningi khona. Ufisa ukuqhubeka nokubhala ngomlando waKwaZulu achaze nangezithakazelo.
Ubuye abe yimenenja kwiGauteng Film Commission.