Umpheki onebhizinisi lokukhiqiza ama-wors
UMA ufisa ukuhlala isikhathi eside ebhizinisini kumele ubheke ukuthi amakhasimende akho adingani ushintshele kulokho okuthengwa kakhulu.
Lokhu kushiwo uNkk Nomzamo Mvubu wase-Adams Mission, weZizakuhle Catering ongumpheki kodwa ogxile ekwenzeni ama-wors.
UNkk Mvubu uthe waqala ibhizinisi lokuhlobisa ngo-2009 ayelenza ngezimpelasonto ngoba wayesebenza. Wabona ukuthi amakhasimende akhe afuna umuntu ozowahlobisela aphinde apheke.
“Ngashintsha ngakwenza kokubili. Ngonyaka odlule bese nginesifiso sokuyeka umsebenzi ngabona ukuthi kumele ngibe nebhizinisi elizongenisa imali zonke izinsuku. Bengifuna into engaqhelile kakhulu kwengikwenzayo yingakho ngikhethe ukwenza ama-wors,” kusho uNkk Mvubu.
Ezinyangeni zokuqala eyeke umsebenzi uqale ngokufuna inkampani angathenga kuyo umshini wokwenza i-wors. Wenza nezifundo zokwenza lo mkhiqizo.
Kuthathe isikhathi eside ezama ukuthola inkampani ezomdayisela umshini ebiza kangcono kwanhlanga zimuka nomoya.
“Ngigcine ngikhethe ukuwuthenga eChina lapho wakhiwa khona ngoba ngibona ukuthi ngeke ngibe nemali yokuwuthenga kwezinye izindawo.”
Okwamanje wenza izinhlobo ezimbili zewors, elenziwe ngenyama yenkomo elingababi nelibabayo. Uwadayisa ephekiwe noma eluhlaza.
“Ngabona ithuba ngoba ngiyazi ukuthi abantu abaningi abadayisa ama-wors roll bayawathenga ama-wors. Ngacabanga ukuthi uma ngizakhela kunamathuba amaningi okuthi ngikhule. Okwamanje asikho isitolo esikhulu engisidayiselayo. Ngidayisela abantu abafuna ukosa, izitokofela, abamasonto, abanemicimbi nabantu abazithengela ukudla emakhaya. Aphekiwe ngiwadayisa engamawors roll ekhaya noma ngama-oda kubantu abanemicimbi noma imihlangano,” kusho yena.
Uthe akawesabi umsebenzi ngoba ngaphambi kokuqala ibhizinisi lakhe wayesebenza enkampanini enkulu esehhovisi kodwa ubephuma emsebenzini ngo-4 ayoshayela i-meter taxi aphume ngo-10 ebusuku.
“Ngangingenandaba nokuthi ngisebenza enkampanini abantu abaningi abazi ukuthi iholela kahle. Mina ngangazi ukuthi ngidinga imali eyengeziwe ukuze ngiqale ibhizinisi lami elizogcina linginika lo mholo wesibili engiwudingayo,” kusho uNkk Mvubu.