Kubongwe abama-meter taxi
ABESIFAZANE abayibambe ishisa emkhakheni wokushayela ama-meter taxi banikwe isipho segilosa namavoucher enyama.
Lesi sipho basinikwe inhlangano yamatekisi angama-meter taxi KwaZuluNatal, iKZN Meter Taxi Alliance.
UMnuz Sizwe Mvubu usihlalo wale nhlangano uthe ukunikezwa kwabesifazane le gilosa kungukubakhuthaza ukuthi bangawusabeli kude lo mkhakha.
Ululeke abesifazane abasafuna ukuba ngabanikazi bezimoto ezingamameter taxi ukuthi bangabaxini abashayeli ngokubafonela bebatshela ngomunye umsebenzi kodwa abaqhamuke nendlela engcono yokusebenza ukuze amakhasimende ezohlale ebathemba.
Phakathi kwabesifazane abathole igilosa uNkk Smangele Sokhela ongumshayeli aphinde abe ngumnikazi wenkampani yezimoto ezingama-meter taxi, Ethekwini Cabs noNksz Princess Dladla ongumshayeli kwiShaka Cabs.
UNksz Dladla uthe washiya umsebenzi wokuba yimenenja kwi-guest house wayoshayela lezi zimoto ngo2009.
“Ngase ngikhathele ukuba yimenenja engenayo imali nomsebenzi ngiwubona ukuthi uyacikizela,” kusho yena.
UNksz Dladla uthi uke waba nayo i-meter taxi okungeyakhe yafa ngoba wayethenge imoto endala.
“Ngabuyela emuva ngayofuna umsebenzi ngaqashwa, ngasebenza kodwa ngisenaso isifiso sokuzithengela eyami imoto,” kusho uNksz Dladla.
Ebonga isipho segilosa uthe ubengazi ukuthi kukhona okubukayo ukusebenza kwabesifazane kule mboni.
“Ukunikezwa isipho esinjengalesi kuzosenza sikhuthale kakhulu emsebenzini. Kuthi noma zikhona izigqinamba singazinaki ngoba siyazi ukuthi imboni yethu iyasinakekela,” kusho uNksz Dladla.
Uthe imfihlo yakhe yokuthi ahlale isikhathi eside kule mboni ukuzithoba, ukutshela ikhasimende isikhathi esiyiso azofika ngaso kulo uma limfonela nokushayela kahle emgwaqweni.