Isishintshwe igama esiza osomabhizinisi

YETHULWE kabusha inhlangano esiza osomabhizinisi esishintshwe igama. IBlack Umbrellas, ebiyaziwa ngeShanduka Black Umbrellas (SBU), yethulwe kabusha emahhovisi eCyril Ramaphosa Foundation (CRF).

I-SBU yazakhela udumo ngokuthuthukisa izinkulungwane zosomabhizinisi abancane nosomabhizinisi abamnyama kulo lonke leli. Sekuphele iminyaka engaphezu kwengu-10 yaqala ukusiza osomabhizinisi. Ukushintshwa kwayo igama kwenziwe emuva kokuba isisebenze iminyaka eyisishiyagalombili ngokuhlanganyela neShanduka Foundation. Inhloso yokusebenzisana bekuwukusiza ukukhulisa amabhizinisi amancane. Bekukhona iPhini likaMengameli uMnuz Cyril Ramaphosa ophinde abe nguSihlalo weCRF ngesikhathi kwethulwa iBlack Umbrellas. URamaphosa wethule nophawu olusha lwenhlangano. IBlack Umbrellas izishaya isifuba ngokuthi isazoqhubeka nokuhamba phambili ekuthuthukiseni osomabhizinisi abancane eminyakeni ezayo. Oyisikhulu seBlack Umbrellas, uNkk Seapei Mafoyane, uthe uzizwa sengathi baqala kabusha kule nhlangano.

“Lesi yisahluko esisha enhlanganweni yethu njengoba sizoqhubeka nokuvumbulula abaholi kwezamabhizinisi. Ukwethulwa kwenhlangano kabusha kukhombisa uguquko oluhle nolusheshayo ekufukuleni umnotho wezwe. Kukhombisa nokuthi siyingxenye yombono omkhulu wokuthuthukisa umnotho wakuleli. Sishintshe igama kuphela kodwa umbono wethu usazofana futhi uzoba ngcono kakhulu,” kusho yena.

Uthe ukwethulwa kabusha kwenhlangano kufike kahle njengoba kuqondane nokuthi benze inzuzo ka-R2 billion kusukela ngo-2012.

I-Black Umbrellas igxile ekufukuleni amabhizinisi aphethwe ngabamnyama. Isiza amabhizinisi iminyaka emithathu yokuqala iwacathulise ekuphatheni ibhizinisi. Njengamanje inhlangano inezikhungo eziyisishiyagalolunye eCape Town, eGoli, eThekwini, Mooinooi, Lephalale, Pitoli, Richards Bay, Port Elizabeth naseBurgersfort. Izikhungo zisiza ngokufukamela amabhizinisi amasha asuke engakabi nazo nezindawo zokusebenzela.