Akugculisi ukuhwebelana
UMENGAMELI weDurban Chamber of Commerce and Industry (DCCI) uMnuz Musa Makhunga, uthe akukakagculisi ukudayiswa kwemikhiqizo yamabhizinis akuleli emazweni ase-Afrika. Ukusho lokhu emcmbini wokuklonyeliswa kwabawine kumaKZN Exporter Awards eNkosi Albert Luthuli ICC eThekwini ngoLwesine. Uthe iKwaZulu-Natal isemathubeni amahle okudayisa kwamanye amazwe ngenxa yokuba namachweba amatasa kodwa kumele kuthuthukiswe ingqalasizinda.
Ngesikhathi kwethulwa abaqokwe kulo mncintiswano muva nje, uMakhunga ugqugquzele osomabhizinisi ukuthi badayise imikhiqizo yabo kwamanye amazwe.
Uthe namabhizinisi amakhulu kufanele avulele amancane amathuba ukuze akwazi ukudayisa nakwamanye amazwe.
“Ngaxoxa nosomabhizinisi odayisa amalahle kwamanye amazwe, oveze ukuthi usebenzisa ichweba laseMozambique ukuhambisa amalahle akhe. Lokhu kukhombisa ngokusobala ukuthi sidinga ukuvulela osomabhizinisi echwebeni lethu.
Kufanele ichweba laseThekwini kube yilona osomabhizinisi abaqala kulo uma befuna ukuthumela imikhiqizo yabo kwamanye amazwe,” kusho uMakhunga.
UNksz Nozipho Sithole oyisikhulu seTransnet Port Terminals ekhuluma kumaExporter Awards, uthe kubalulekile ukuthuthukisa amakhono kosomabhizinisi ukuze badayise imikhiziqo kwamanye amazwe. Ukhuthaze nokuthi kuvezwe izindlela ezintsha ezizoheha abathengi kwamanye amazwe.
“Uma kungekho esikwenzayo ngechweba laseRichards Bay lizovalwa eminyakeni ezayo. Maduze akekho ozobe esenendaba namalahle, okuyiwona akuleli chweba,” kusho uNksz Sithole.
Ugcizelele nokuthi kugxilwe nasekusebenziseni ubuchwepheshe ukudayisa amabhizinisi akuleli kwamanye amazwe. Uthe kumphatha kabi ukuthi iNingizimu Afrika ayiselona izwe elihamba phambili e-Afrika njengoba selidlulwa yiNigeria ne-Egypt.
Kulo mcimbi kugqame ukuthi abamnyama basagqoza emabhizinisini adayisela amanye amazwe imikhiqizo yawo njengoba kwabawinile bekukhonya ezinye izinhlanga.