Bayifezile imigomo abesezingozi
ABESIKHWAMA sezingozi iRoad Accident Fund (RAF) bawuphothule ngegiya eliphezulu unyaka wezimali njengoba begcine u-90% wemigomo abebezibekele yona kwezezimali.
Sekuyiminyaka emibili ilandelana abakwaRAF benza kahle kwezemali. Nonyaka baphinde bathola umbiko wezimali ongenagcobo okwesine iminyaka ilandelana. Oyisikhulu esibambile kwaRAF uNksz Lindelwa Jabavu uthe kuyabajabulisa ukuthi benze kahle kangaka ekubeni lesi sikhwama besibekwa izici.
Uthe impumelelo yabo kwezemali ikhombisa ukuthi benza umehluko omkhulu empilweni yabahlukumezeke emgwaqweni.
UNksz Jabavu uthe okube nomthelela ekwenzeni kwabo kahle kubalwa ubuholi obuqotho, ukukhuthazwa kwabasebenzi nokuzikhandla kwabo nokunye.
“Bekungelula ukufinyelela kulo mgomo phezu kwezinselelo ebesibhekene nazo nesimo sezimali.
Nokho ukuzikhandla kwethu nokwabasebenzi bethu abangu-2 676 kuyancomeka,” kusho uNksz Jabavu.
Umi kanje umbiko wezimali zakwaRAF onyakeni ka-2016/17:
-Bangu 202 100 abafake izicelo ezintsha zokukhokhelwa, kwaphothulwa izicelo ezingu-209 561.
-Zingu 794 izicelo ezisetshenzwa ngosuku.
-Isikhwama singenise uR33.34 billion kanti ngonyaka odlulile senze uR33.31 billion.
-Kukhokhwe uR2.1 billion wezindleko zodokotela.
-Kwakhokhwa uR130 million wezindleko zemingcwabo.
-UR7.9 billion ukhokhele izindleko zabameli.
-UR7.6 billion ukhokhelwe abalimele.
-UR13.5 billion wakhokhelwa abanye abangasakwazi ukuziphilisa.
- Izicelo ezingumkokotelo ezibanjiwe zingakakhokhwa bekungezika R901 million, kwavulwa amacala angu-418 emaphoyiseni.