OwoSuthu ushaywa wuvalo ngoTshabalala
ISITOBHA saMaZulu, uSimphiwe Mtsweni, siphumele obala ngokuba yingozi kukaSiphiwe “Shabba” Tshabalala weKaizer Chiefs. NgoMgqibelo ngo-8.15 ebusuku Usuthu luzodudulana naMakhosi emdlalweni weLast 16 yeTelkom Knockout eMoses Mabhida Stadium, eThekwini. Kulo mdlalo uMtsweni uzobe ebhekene neqembu lakhe elidala nomdlali akhule ebukela kuyena uTshabalala. Exoxa naleli phephandaba ubalule ubungozi bukaShabba amchaze njengomdlali ophethe unyawo langakwesokunxele oluhloliwe. “Kuyakhuthaza ukudlala neqembu elifana neChiefs. Ukudlala namaqembu amakhulu kuhlale kukufakela ugqozi njengomdlali. Ayikho indlela ehlukile esizihlelela ngayo kodwa ukudlala neqembu elinomdlali ofana noShabba akuyona into encane. Iningi lethu likhule libukela kuShabba. “Manje sekumele ungene naye enkundleni, awuyicabange nje leyo nto, iyakhuthaza iyodwa. Nakanjani kumele afike ngimlungele. UShabba ungumdlali engimhloniphayo kakhulu. Uma udlala noShabba kumele uhlale uphaphame ngoba awazi angenzani nini. Leliya nxele lihloliwe futhi lipholishiwe. Ngeke nje uvele ungene eShoprite ufike ulithenge. Uphethe isipiliyoni lowaya muntu. Nokho ngeke sigxile kuyena kuphela ngoba ngingathi ngigxile kuyena balethe omunye umuntu,” kusho uMtsweni.
Usuthu alukaze luyishaye iChiefs kowomkhumulajezi ngaphansi kwePremier Soccer League (PSL) esungulwe ngo-1996/1997. La maqembu asahlangane kanye kuphela kwiTelkom, Amakhosi anqoba ngo-1-0.
“Imidlalo iyefana kodwa ngeke ngikubalekele ukuthi uSimphiwe unguSimphiwe ngenxa yeChiefs. Ukube uSimphiwe akadlalelanga iChiefs ngabe iNingizimu Afrika ayazi ukuthi ungubani. IChiefs ingakhile yangenza le nto engiyiyo njengamanje. Akuyona inhloso yami ukuyiphoxa iChiefs. Ngiwubani mina ongaphoxa isikhungo esikhulu njengeChiefs? Inhloso wukuthi iqembu lidlale ibhola elimnandi bese linqoba umdlalo. Asifuni abalandeli bakhalele imali yabo,” kusho uMtsweni. IMIDLALO yeTelkom Knockout Last 16: Kusasa: Maritzburg United v Platinum Stars (Harry Gwala Stadium, 8pm)
NgoMgqibelo: Golden Arrows v Orlando Pirates (Princess Magogo Stadium, 3.30pm); Polokwane City v Ajax Cape Town (Old Peter Mokaba Stadium, 3.30pm); Bloemfontein Celtic v SuperSport United (Dr Molemela Stadium, 6pm); Bidvest Wits v Free State Stars (Bidvest Wits, 8.15pm); Kaizer Chiefs v AmaZulu (Moses Mabhida Stadium, 8.15pm)
NgeSonto: Baroka FC v Cape Town City (Peter Mokaba Stadium, 3.30pm); Chippa United v Mamelodi Sundowns (Sisa Dukashe Stadium, 3.30pm)