Uphefumula ngeyokuzitshwa kwelesizwe uRamagalela
AYIMKHATHAZI eyokuzitshwa kwiBafana Bafana umgadli wePolokwane City uRodney Ramagalela osefomini ngendlela eyisimanga kulezi zinsuku.
URamagalela uzihola phambili ngokuhlohlwa kwamagoli kwi-Absa Premiership. Ngemuva kwemidlalo eyisishiyagalolunye, uRamagalela usehlohle amagoli ayisithupha. UTokelo Rantie nguyena kuphela umgadli oselenze elakhe ijezi kwiBafana.
Ngemuva kwemidlalo engu-44 uRantie usafake amagoli angu-12. Abaqeqeshi abahlukene kwiBafana sebezame inqwaba yabagadli ukwakha umbango wejezi kwelesizwe.
U-Ephriam “Shakes” Mashaba ocija iBafana uzame uBongani “Drogba” Ndulula, David Zulu, Lehlohonolo “Major” Majoro, Kermit Erasmus, Thamsanqa Gabuza, Rantie noPrince Nxumalo. Ngakolunye uhlangothi uStuart Baxter ongumqeqeshi omusha weBafana usezame abagadli abahlukene kodwa lutho ukubiza uRamagalela.
UBaxter uzame uBradley Glober, Lebohang Mothiba, Lebogang Manyama, Dino Ndlovu noRantie. URamagalela ukubeke kwacaca ukuthi akakugqizi qakala ukushaywa ngesithende kwelesizwe. Namuhla uBaxter uzomemezela iqembu elizobhekana neSenegal.
“Ukubizelwa eqenjini lesizwe yinto engaphezu kwamandla ami. Ithimba labaqeqeshi eliqoka abadlali yilona okumele lenze ubulungiswa ngokubiza abadlali abafanele kwelesizwe. Mina anginawo amandla kulokho. Okumele ngikwenze wukuqhubeka nokusebenza ngokuzikhandla nokutholela iqembu amagoli amqoka,” kusho uRamagalela.
IBafana inemidlalo emibili enzima ngenyanga ezayo lapho izoshukana khona neSenegal ekhaya nasekuhambeni. Njengamanje iBafana ihlezi endaweni yokugcina kwi-log ngamaphuzu amane ngemuva kwemidlalo emine.
Elakuleli lidinga amaphuzu ayisithupha emidlalweni yayo emibili yokugcina ukuze lizibekisele indawo kwiNdebe yoMhlaba eseRussia ngo-2018.
“Uma unabantu abakholelwayo kuwena uhlale uzovuna izithelo ezinhle. Usuke ungazuza noma yini. Ukusebenza ngokuzikhandla ngenye yezinto eyenza ngibe sefomini. Okwamanje anginaso isibalo samagoli engihlose ukusishaya. Umgomo engizibekele wona ngowokufaka isandla ekutheni iqembu ligcine indawo yalo esigabeni esikhulu,” kusho uRamagalela.