Ngitinyela abephula imithetho yomqwaqo
NGIYABINGELELA kubathandi bale nto enyakatho naseningizimu, empumalanga nasentshonalanga, phansi naphezulu ngithi zonke ezihashukele lo mkhumiso mazishaye esidume ngazo ziyikhuze ithithibale insimb’yomlungu zisho ziwe ngeminwe phezu kwezinkinobho zama-hazard kukhanye ogqam’cishi zilahle amawolintshi maqede sikhwebukele lapho kuphephe khona, sincinde kulolu dengezi lwemihla oluthakwe ngezicuyo zokudumayo kwelakho lodumo lokuwela umfula ugcwele kwazise selufikile olungaliyo.
Njengoba sesigoqa u-Okthoba inyanga yezokuthutha eNingizimu Afrika, ngithi mangithathe usiba ngiklwebhaklwebhe imigqa edle ngokujiya ngiyibhekise kubasebenzisi bomgwaqo abanomkhuba oyingozi futhi ocikayo emgwaqweni.
Iningi labashayeli alithandi ukutshelwa ukuthi lishayela ngobudlabha ngakho-ke ngiyazi ukuthi sengizidonsela amanzi ngomsele ngoba kunengizophuma nabo iqhubu ngiphinde ngibophe ngabhande linye yize ngazi ukuthi iqiniso lithi akubona bonke abaziphatha kabi. Bashayeli bamatekisi hlukanani nokwenza sengathi yinina nodwa enikwazi ukushayela noma enijahile ngokuthi nihambe lapho kungahanjwa khona nizishwathike nalapho isikhala singekho. Donsani isineke nisibeke dash board kwayisholo u-Ayanda Msweli kuKhozi FM.
Bashayeli bamaloli amakhulu ikakhulukazi emgwaqweni uN3 phakathi kwePietermaritzburg neVan Reenen, kwenzeka kanjani ukuthi nisikane ekubeni nazi ukuthi amaloli enu awakwazi ukushesha ngempela? Ufunani uhomu emgudwini wezisheshayo, nidala isiminyaminya emqanseni.
Bashayeli bamabhasi aseThekwini abizwa ngobhopopo phezani ukugxisha abantu sengathi amasaka emabhasini enu kodwa nabo bayigibela kanjani ibhasi ivele igcwele, uma kungathiwa iyasha ngeke kuphume muntu. Iyingozi le nto yenu.
Bashayeli bamatekisi erenki yaseMbali kuPitimane eMgungundlovu musani ukwenza sengathi owenu nodwa loya mgwaqo. Tholani indlela yokuma eceleni nivulele ukugeleza kwezimoto ngenkululeko, iyacika lento yenu.
Maphoyisa omgwaqo aseMgungundlovu ake nifunde ukubopha izephulamthetho zomgwaqo. Phela kukwamachanca enhlokodolobha yingakho kwaphuma ucwaningo oluthi izidakwa zabashayeli eziningi zitholakala kulelidolobha. Bhalani amathikithi niyeke ubuvila.
Bashayeli besifazane ake niyeke ukufaka izibuko ezidimile uma nishayela ngisho liguqubele yingakho nihlala nisolwa ngokushayela kabi, inobungozi lento yenu.
Bashayeli abasebancane ikakhulukazi abafana hlukanani nokushayela niqethule izihlalo uma kufanele ubambe imoto noma uvike ingozi ngokushesha uzovuka nini njengoba ushayela ulele, ayidlisi lento yenu.
Bashayeli bezimoto ezinamapuleti asemadolobheni nasemalokishini ningasibukeli phansi uma sihamba ngezimoto ezinezinombolo zasemakhaya njengo NUL, NKA, NM, NDW, NUB, NF, NW, NKU, NTU, NMZ, NH, NCW njalo njalo nathi sinezincwadi eziphelele njengani, yekani le nto yenu.
Maphoyisa kamasipala weTheku hlukanani nokuphuma iqhubu nezimoto ezishibhile noma ezinezinombolo zangaphandle kweTheku niyeke ukumisa ezikanokusho ngoba nazo ziyaba namaphutha, iwubandlululo lento yenu.
Bahambi ngezinyawo emadolobheni hloniphani izimoto emarobhothini ikakhulukazi kuChurch Street eMgungundlovu nasemakethe eThekwini nani eneqa imigwaqo engothelawayeka njengaku N2 ngaseMgababa nidala izingozi ezingenasidingo, uBheki Cele wayenibophela yona lento yenu.
Bagibeli baseNewcastle, eMtshezi, Mnambithi, Olundi nakwaDlangezwa hlukanani nokugingqa izithupha akukho emthethweni ayaluma yini amatekisi nezitimela zangasemakini, ayiphephile lento yenu.
Zalukwazi zabelungu ngiyethemba zizonitolikela izincelebane zenu hlukanani nokugoloza nomzila wezisheshayo umathetho wethu uthi shayela ngakwesokunxele udlule ngakwesokudla, iyisicefana lento yenu.
Bagibeli bezithuthuthu musani ukugcwaneka nokudlula nezibuko zezimoto zethu ngokungqengqa ngemigqa ehlukanisa imigudu yezimoto, iwukugcwaneka lento yenu.
Maphoyisa akwaSAPS khandani amaveni ngemali yethu bakhokhi bentela musani ukulanda iziboshwa ngezimoto eziyimikhehlekhehle ezinye zizingela ngenja eyodwa, iyihlazo lento yenu.
Ziqhwaga musani ukuvimba thina sonke esingangene engxabanweni yenu yokushayelisana kabi uma nixabana emgwaqweni. Uma nifunana buyelani eceleni nehle ezimotweni niqedane ubunsizwa ningasifaki thina esingangene, iwububhoklolo lento yenu.
Baduni bezimoto musani ukusibulala uma nisephuca izimoto zethu, nizoduna bani ngomuso uma nisibulala thina esingena ezitolo sithenge izimoto ngoba nina niyesaba ukungena lapho zidayisa khona, iwubuvaka lento yenu.
Zishimane zabashayeli abashela ngezimoto yekani odadewethu nabafazi bethu bahambe ngokukhululeka ningalokhu nibabhaza ngezimoto ngokuvumuzisa izimoto zenu ezibanga umsindo eduze kwezabo ngoba nifuna bachazeke bese nicela izinombolo emarobhothini, isabushimane lento yenu.
Bazali abathanda ukuhlala nezingane zabo ezitelingini nishayela phezani lomkhuba wokwenza sengathi nizithanda kakhulu izingane zenu nibe nizibeka engozini, uyingozi enkulu lomkhutshana wenu.
Bashayeli abangenasimilo hlukanani nokushayela nenza umkhuba wasekamelweni ezimotweni zihamba, ingamanyala lento nengozi enkulu.
Bashayeli abathanda utshwala hlukanani nokushayela nibugaxile, iwubula nengozi lento yenu.
Bathandi bejubane gcinani imithetho yomgwaqo noma niye eDezzi Raceway eNPS niyopita khona, iwubudididi lento yenu.
Hhayi-ke senginintinyelile nizwile ningematshe nginibophe ngabhande linye ngamabomu ngiyazi akunina nonke eniyizephulamthetho. Uma kukhona abasale ngephutha sisengakhuluma ngabo ekhasini lethu Igedlela Lami with Sthembiso Shangase.
Ngisacela siwavale amahazard sibuyele emgwaqweni ngokuphepha nokulawulwa yiyo yonke imithetho yezokushayela ebusa leli zwe lethu siwelele kuLwezi sisaphila ukuze sihlangane sisaphele kuyo le ngosi. Yimi owenu nali ikheli ngezansi hazardiso@gmail.com