Batinyelane ngeka-Emtee nomphambili
KUTINYELANE abaculi abahlonishwayo kwezomculo kuleli nge-video eveza umrepha u-Emtee echama kuvela umphambili, ayifake ekhasini lakhe ku-Instagram izolo. Bakhuze ibhadi abaningi ezinkundleni zokuxhumana ngemuva kwale video, abanye bezibuza ukuthi ungenwe yini u-Emtee (osesithombeni), ogama lakhe nguMthembeni Ndevu.
Lo mrepha uyithathe bukhoma le video esethoyilethi echama kudlala umculo ngemuva. Ngemuva kokusabalala kwayo uyisusile kodwa abantu bese benayo bayifaka kwiTwitter nakuFacebook.
Phakathi kwabaphawulile ngevideo kubalwa nosaziwayo abagcine sebejovana ngalolu daba uMgarimbe wodumo lweculo iSista Betina, noSjava ongumngani futhi oqopha no-Emtee.
“Nali is…(esho igama elilumelayo lomphambili) lika-Emtee, ngiyacela futhi ningamudeleli ngesitho sakhe bantu besifazane,” kusho uMgarimbe.
Noma engaphendulanga wabhekisa kuMgarimbe, kucacele ngisho ingane encane ukuthi umbhalo kaSjava olandele le nkulumo ububhekiswe kuyena.
“Kuneciko elinengoma eyodwa sengathi imoto ka-ice cream. Wayeyicula sisakhula sesize siyaguga usayicula, naye ujabulile ngeD kaNdevu,” kusho uSjava.
Kuzokhumbuleka ukuthi uMgarimbe namanje usadlisa ngeSista Betina eyaphuma ngo-2006.
Ephendula uMgarimbe ubhale wathi: “Mina ngeke ngidelelwe yiciko elihola ekupheleni kwenyanga noma ngabe linezingoma ezishisayo eziyizigidi! Awuhlukile kumuntu osebenza kwamlungu.
Ephawula ngalolu daba u-Emtee uthe le video ingene ngephutha ku-Instagram. “Kube yiphutha nje. Bengikhuluma nabalandeli bami ngesikhathi ngisethoyilethi. Ngithe sengehlisa isibambo sokwehlisa umchamo ngamanzi, ngasibamba ngesandla ebengibambe ngaso iselula kwabe sekuvela umphambili kanjalo ke,” kuchaza u-eMtee. Uthe yaxolisa kakhulu kubantu abaphoxekile futhi akekho umuntu amzondayo emuva kokuthi i-video iphendulwe ihlaya.