UKekana ukhombise ukuthi usakwazi ukujika
ISIHLABANI somculi esingaboni, uSteve Kekana, sishaye ivosho kwachwaza izihlwele emcimbini iFreedom Heritage Festival obuseOlive Convetion Centre ngeSonto ebusuku.
Umcimbi, obekunandisa kuwo izingqungqulu zomculo, bekuhlonishwa ngawo owayenguMengameli we -ANC, u-Oliver Reginald Tambo.
USteve ungene esiteji ezocula noJoe Nina ingoma ethi Iphupho, abayishaye kwanyakanza ihholo.
USteve ube esebingelela wanxusa abantu besilisa ukuba baphathe kahle abantu besifazane, ngisho noma sebebona ukuthi uthando luphelile babatshele kahle, bangabaphoxi. Yena benoJoe babe sebeshaya inoni lengoma yakhe ethi Take Your Love And Keep It. USteve umangaze abaningi eshaya ivosho. Kusukume abantu bonke abebehambele umcimbi bama ngezinyawo. Abanye nabo bese bezama ivosho bethi ngeke bahlulwe uSteve osekhulile kodwa osakwazi ukushaya ivosho kubencane indawo. Ababili abangaboni bayiswe esisteji bezodansa noSteve ngoba kade beveze ukuthi bamkhonze kakhulu.
Phakathi kwabanye abebenandisa emcimbini kube yiLadysmith Black Mambazo, uSipho “Hot Stix” Mabuse, uMbongeni Ngema, uSjava, Amanda Black, Shabalala Rhythm noMpume Hlabisa nabanye. Bonke bebeshaya amanoni abo. UHot Stix ushaye amanoni akhe iBurnout, Jive Soweto, Shikisha namanye. Uqale ngomkhuleko ngaphambi kokuba adlale.
UMbongeni naye uphenduke ingane encane ejika esisteji eshaya awakhe amanoni okubalwa kuwo Ibuyile I-Afrika, Wozamafohloza namanye.
U-Amanda Black ucule ezinye izingoma neMambazo. “Sengathi yiphupho ngicula neMambazo, ngizizwa ngithobekile kakhulu. UNkulunkulu mkhulu ngoba wenza konke okuhle empilweni yami.”
U-Amanda uyena ovale umcimbi ngengoma yakhe ethi Amazulu. Uhlelo beluphethwe ngobunyoninco uSya Mhlongo woKhozi FM, obekhombisa ukuba namava nolwazi ngokuphatha umcimbi.