Baphinde bavunwa yivoti kuma-Idols SA
LIPHINDE lanyuka ithemba lokuthi isicoco somncintiswano womculo ama-Idols SA sizobuyela KwaZulu-Natal njengoba abaculi ababili bakulesi sifundazwe bekwabane asebesele.
Abakulesi sifundazwe abadlulele emzuliswaneni olandelayo nguMthokozisi Ndaba (25) waseNanda noPhindy Dube (19) waseManzimtoti. NgeSonto kukhishwe uFaith Msibi kwasala uMthoko, Phindy, Botlhale Phora (21) waseGarankuwa ePitoli noPaxton Fielies (16) waseBishops Lavis eWestern Cape. Amavoti athunyelwe ngabantu abelinganiselwa ku-12 million.
Abaculi bashaye izingoma ezimbili. Kuqale uBotlhale oshaye i-One Of Us kaJoan Osborn wabuya nge-One Call Away kaCharlie Puth. Kulandele uPhindy ngengoma kaRingo ethi Sondela wagcina ngekaBeyoncé ethi Sorry.
UPaxton ucule i-I Turn To You kaChristina Aguilera ne-In Common ka-Alicia Keys, eyenziwe kabusha wuBlack Coffee, uMthokozisi ucule eyeBoyz II Men ethi Hard To Say Goodbye neWhat Do You Mean kaJustin Bieber.
Okhulumela uMnyango wezobuCiko namaSiko KwaZuluNatal, uMack Makhathini, uthe bajabule ngalokhu.
“Sihlale sisho ukuthi njengesifundazwe sinendathane yethalente. Sifuna ukukusho kucace ukuthi sibeseka bonke abasesifundazweni sethu abangenele. Sibafisela inhlanhla,” kusho uMakhathini.
Ukuvotela uMthokozisi uthumela i-sms enenombolo 01 ku-37400. UPhindy yena uthumela u-06 enombolweni efanayo. I-sms ngayinye ibiza uR1.50 kanti ungavota ka-100. Ungavota naku-www. idolssa.tv.