Bakhale ngesikhathi kubhalwa iMaths
KUHLUKENE imibono ngephepha leMaths neleMaths Literacy kubafundi bakwamatric njengoba abanye bethi yize libhalekile kodwa isikhathi besisincane.
Abafundi abakhulume neSolezwe baveze ukuthi lawa maphepha abengekho nzima bathi bawaphasile.
IMaths ingesinye sezifundo abafundi abahlale bekhala ngokuthi silukhuni.
USindiso Khuzwayo (18), ofunda eMenzi High eMlaza, uthe amaphepha eMaths awabhale ngoLwesihlanu nayizolo abebhaleka.
Uthe uye ethukile kodwa wafike wakhululeka uma ethola ukuthi izinto eziningi eziphumile ubezazi.
“Abengekho nzima amaphepha, abebhaleka kahle nje. Elesibili belidinga isikhathi esithe xaxa ngenxa yemibuzo yalo kodwa-ke wonke aphasekile. Elokuqala lalilula kakhulu,” kusho uSindiso.
Uthe ufuna ukwenza iziqu ze-B Com Accounting e-University of Zululand noma e-UKZN.
ULindo Khwashube (18) ofunda kulesi sikole, uthe vele uyazazi ukuthi udabule o-A kulesi sifundo ngoba amaphepha abelula.
Uthe akangabazi ukuthi kwelokuqala uthole ngaphezulu kuka-90% kanjalo nelesibili.
“Ngiwumuntu othola o-A vele kwiMaths, ngakho amaphepha abelula. Ngiyokwenza iziqu zeChemical Engineering e-UKZN,” kusho uLindo.
UThabiso Mdlalose, ofunda eNtshiseleko High, eNanda uthe iphepha lokuqala leMaths Literacy belilula.
“Elesibili lona belidinga isikhathi kodwa nalo belibhaleka. Kuneminye imibuzo ebengiyibona okokuqala kodwa ke ngizamile ukuhlanganisa. Uma ngiphasa ngiyokwenza iziqu zeMarketing eDUT,” kusho uThabiso.
UNoluthando Khuzwayo ofunda eMzwamandla High, eMlaza ukhale ngesikhathi ephepheni lesibili leMaths Literacy.
“Isikhathi yisona esibe yinkinga ngaphandle kwalokho libhalekile. Elokuqala lona lalilula kakhulu ungathi babazi ukuthi sifundeni. Ngalibhala ngijabule ngibona konke engikwaziyo. Ngifuna ukwenza iziqu zeSocial Work e-Unisa uma ngiphasile.”