Imashi ezothikameza abagibeli
BAZOSALA dengwane abagibeli bamatekisi ePinetown, KwaDabeka naseClermont njengoba amatekisi ezobe engabonwa kulezi zindawo kusasa.
Abanikazi bamatekisi kulezi zindawo bathi ngeke abe khona amatekisi ngoba bazobe bemashela uhlelo lwamabhasi iGo Durban.
Bathi sebekhathele uMasipala weTheku odlala umacashelana ngalolu hlelo lwamabhasi oluzothinta imizila yabo.
UMnuz Bheki Mbambo, wePinetown Taxi Owners Association, uthe sekunesikhathi eside betshela umasipala ukuthi banekomiti labo abafuna ukuthi libamele ezingxoxweni zikamasipala ezidingida lolu daba kodwa kube nhlanga zimuka nomoya.
Uthe umasipala ubatshela ukuthi kunohlaka olulawula amatekisi kuleli dolobha, i-EThekwini Municipal Management Taxi Council (EMMTC) olubamele.
“Lolu hlaka alwazi lutho ngezinselelo esihlangana nazo emizileni yethu futhi nalo alunazo izimpendulo mayelana nokuthi uhlelo lokuthuthwa kwabagibeli basondezwe emabhasini, iFeeder System, luzosebenza kanjani. Sifuna ukwazi ukuthi ngobani abazodayisa amathikithi alawo mabhasi, ngobani abazohlanza izitobhu zamabhasi okukhulunywa ngawo, konke lokhu akucaci,” kusho uMbambo.
Uthe abaqondile ukulwa nalolu hlelo kodwa bafuna ukuhlomula kulo ngoba luzothikameza indlela abasebenza ngayo.
Uthe ngokubona kwabo kunosomatekisi abazophelelwa umsebenzi abasebenzisa le mizila.
“Sizwa kuthiwa kunesinxephezelo esizonikezwa labo bantu. Uma sibuza ukuthi ngabe bazonikezwa imali yini abazolahlekelwa umsebenzi ngenxa yalolu hlelo, akucaci. Sikholwa ukuthi zonke lezi zinto esizibuzayo umasipala uzifihla ngamabomu ngoba leyo misebenzi seyinikezwe abantu abathile,” kusho uMbambo.
Uthe amatekisi azobuyela emizileni ngoLwesine, ngoLwesithathu bazomasha besuka kuBotha Park baye eCity Hall, eThekwini.
UNkk Tozi Mthethwa okhulumela umasipala uthe bazothinta iminyango ethintekayo ukuze baphawule ngalolu daba.