Indoda ishe yangqongqa emjondolo
KUSOLWA ukuthi uzunywe wubuthongo engasicishanga isitofu owesilisa oshe wawumlotha emjondolo wakhe eNewlands West izolo ezintatha.
UMnuz Lizwi Deyi (28), odabuka eMbizana e-Eastern Cape, kuthiwa ubehlala yedwa kulo mjondolo oseRiverdene khona eNewlands. Isidumbu sakhe sitholwe singumlotha izolo kanti kusolwa ukuthi umlilo uqale entathakusa ezunywe wubuthongo.
UNksz Gugu Zulu, oyikhansela kule ndawo, uthe uvuswe ngomakhelwane bakamufi bemshayela ucingo ngezithuba zabo 5.30 ekuseni.
“Omakhelwane bathe babonile sengathi kuyasha emjondolo ekuseni kakhulu kodwa bebengazi ukuthi kukhona umuntu ngaphakathi. Isihlobo sikamufi esikhulume naso, sithe ubekade ehlukane naso efuna ukuyofudumeza ukudla. Yingakho kusolwa ukuthi ukhohlwe wukucisha isitofu sikagesi kwase kuyasha,” kusho uNksz Zulu.
Uthe kushe yonke into ebisendlini, bese kubonakala kuphela amabhodwe nezinsimbi zombhede.
UNksz Zulu uthe usizwe ngamalungu ekomiti le-wadi bashayela imoto yezidumbu esheshe yafika.
Ngesikhathi sokuloba besingatholakali isihlobo sikamufi uNksz Beatrice Zulu. Obambe ucingo lukaNksz Zulu uveze ukuthi usemsebenzini. Kuthiwa kuthunywe yena ukuthi abikele umndeni kamufi oseMbizana ngalo monakalo.
Okhulumela amaphoyisa KwaZulu-Natal, uCaptain Nqobile Gwala, uthe umufi ushonele emjondolo wamapulangwe.
“Kuvulwe idokodo lokufa komuntu emuva kokuba eshe esemjondolo. Icala liphenywa ngamaphoyisa aseNewlands West. Akwaziwa ukuthi yini equbule umlilo,” kusho uCaptain Gwala.