Iposi lizodinga ukufakwa isandla: Dlamini
UNGQONGQOSHE wezeNhlalakahle yoMphakathi uNksz Bathabile Dlamini uthe iposi lizodinga ezinye izinkampani ukuthi zifake isandla ekukhokhweni kwemali yezibonelelo zikahulumeni uma sekuphela inkontileka yeCash Paymaster Services (CPS).
Lokhu ukuveze izolo lapho ebazisa isizwe ngezinhlelo zokuqhubeka kukhokhwe izibonelelo noma sekuphele le nkontileka.
INkantolo yoMthethosisekelo yanquma ukuthi kumele ngo-Ephreli 1 ngonyaka ozayo kuqale kukhokhe inkampani entsha izibonelelo.
“Kunezinye izinhlelo iposi elingeke likwazi ukuziletha, okuzodinga ukuthi siqashe ezinye izinkampani ezizosizana nale nhlangano ukukhokha izibonelelo. Ezinye zazo ngukuthi alinayo ilayisensi egcwele yokukwazi ukunikeza ngamakhadi asebhange abalelwa ku-4.8 million,” kusho uNksz Dlamini.
Uthe bazoqhubeka nokufuna abanye abazosiza iposi, kusuka ngoLwesihlanu balindele ukunika ithenda labo abazobe bethole umsebenzi ngoFebhuwari 2018.
Kwenzeka lokhu nje namhlanje kulindeleke ukuthi uNksz Dlamini achazele ikomiti elibheka ukusebenza kwemali ePhalamende, iScopa nekomiti loMnyango wezeNhlalakahle ngebanga eselihanjiwe kulolu daba.
Isikhulu seposi, uMnuz Mark Barnes sithe bazochaza kabanzi ngalolu daba kula makomiti asePhalamende ngoba ezinye zezinto ezishiwo ngabo azilona iqiniso.
Nakuba amakhadi okuhola izibonelelo ebhalwe ukuthi azophelelwa yisikhathi ngoDisemba nonyaka, uNksz Dlamini uthe abantu abangatatazeli.
UNksz Bridget Masango, okhulumela iDA kwezenhlalakahle yomphakathi, uthe bakhathazekile ngesimemezelo sokuthi iposi alihlangabezani neminye yemibandela yokuthi likwazi ukukhokha izibonelelo.
Uthe isimemezelo sikaNksz Dlamini sishiya imibuzo ngoba abeposi bayazichitha izinsolo zokuthi ngeke bakwazi ukukhokha izibonelelo.
“Kuyacaca ukuthi uNksz Dlamini uzama ukwakha ezinye izinto ukuze aqhubeke nenkontileka neCPS. Isikhathi siyahamba kumele iSassa ithole abazokwazi ukukhokha izibonelelo. UNksz Dlamini uyabaleka ePhalamende njengoba engafiki ukuzochaza ngebanga eselihanjiwe kulolu daba.”
Uthe bazomphonsa imibuzo namhlanje phambi kwamakomiti.