Imibono yabahlaziyi ngesinqumo sikamengameli we-IFP
ABAHLAZIYI bezepolitiki bathi isinqumo sikaMengameli we-IFP, inkosi uMangosuthu Buthelezi, sokubeka phansi izintambo, ashiye umholi othathwa njengevukana, sizolilimaza iqembu ikakhulukazi njengoba kuyiwa okhethweni luka-2019.
UButhelezi wethuse abaningi ngeSonto ememezela ukuthi uzozibeka phansi izintambo engqungqutheleni yeqembu okulindeleke ukuthi ibe sekupheleni konyaka. Uthe izinhlaka zeqembu ziphakamise igama leMeya yaKwaHlabisa, uMnuz Velenkosini Hlabisa ukuthi ibe ngumengameli.
Umhlaziyi wezepolitiki ozimele, uMnuz Protas Madlala, uthe akaboni kuphusile ukuthi uButhelezi ashiye manje njengoba kubhekwe okhethweni luka2019.
“Uma iqembu lizimisele ngokwenza kahle okhethweni oluzayo futhi lisazimisele ngokuthatha iKwaZulu-Natal kwi-ANC ngibona i-IFP isamdinga uMntwana waKwaPhindangene ezintanjeni,” kusho uMadlala.
Uthe akaboni uButhelezi ezibeka phansi ngempela izintambo. “Sekukaningi uButhelezi ememezela ukuthi uzibeka phansi izintambo kodwa abuye abonakale eseqhubeka, mina ngiyokholwa uma sengimbona egcoba umholi omusha,” kusho uMadlala.
Omunye umhlaziyi wezepolitiki, uMnuz Thabani Khumalo, naye uhambe emazwini kaMadlala wathi akamboni uButhelezi ezibeka phansi izintambo.
Uthe angabuya ikakhulukazi njengoba iqembu liphakamise umholi oyivukana.
“Ukuqokwa komholi engimthatha njengevukana kuyawandisa amathuba okuthi simbone ebuya uButhelezi,” kusho uKhumalo.
Uthe enye into ezoshaya iqembu yindlela elethule ngayo uHlabisa ozovala isikhala sikaButhelezi.
“Engqungqutheleni ka-2012, iqembu lasungula isikhundla sePhini likaMengameli obekuthiwa liyaqeqeshwa ukuze lithathe izintambo. Uma sekuqokwa omunye selishaywa ngesithende. Ngibona lokhu kuzoliphazamisa iqembu,” kusho uKhumalo.