Ufuna abaluleki bezolimo babe semphakathini
ININGIZIMU Afrika kumele ihlaziye indlela abeluleki bezolimo abasebenza ngayo kuhlanganisa nokuthi bahlale eduze kwemiphakathi abayisebenzelayo.
Lokh kushiwo uNgqongqoshe wezoLimo, amaHlathi nokuDoba kuleli, uMnuz Senzeni Zokwana evula ingqungquthela yabeluleki bezolimo e-Afrika, i-3rd Africa Forum for Agricultural Advisory Services (Afaas) eThekwini, izolo.
UZokwana uthe abeluleki kungakuhle bahlale eduze komphakathi abawusebenzelayo bangahlali emadolobeni njengoba kwenzeka njengamanje.
Uthe kwesinye isikhathi abeluleki basebenzisa imoto eyodwa uma beya emphakathini okuholela ekutheni bangafiki ngesikhathi abafisa ukufika ngaso.
“Uma sebehlala emphakathini ngeke sibe khona isidingo sokuthi balinde imoto eyodwa ngoba bazobe beseduze nabalimi,” kusho yena.
Uqhube wathi nomphakathi ungakhuthazeka kalula uma umeluleki eseduze futhi enesiqeshana somhlaba asilimayo.
UZokwana ubuye wathi kulihlazo ukuthi ukudla okuningi kutshalwa e-Afrika kodwa kuguqulwa kwenziwe eminye imikhiqizo kwamanye amazwe, abantu base-Afrika bakuthenge.
Uthe baningi abantu abehlulekayo ukuzithengela ukudla bagcine sebebulawa yindlala.
“Uma kungenzeka sibe nokudla okwanele kungaba nokuthula e-Afrika ngoba abantu abaningi bahamba amazwe amaningi ngenxa yokuthi kunendlala emazweni abo.”
Uthe unethemba lokuthi ingqungquthela ezophothulwa ngoLwesihlanu izoqhamuka nesisombululo sokuthi amazwe aseAfrika angasebenzisana kanjani, ukuze abhekane nezinkinga zokushintshashintsha kwesimo sezulu nezinye izingqinamba zezolimo ezibhekene nabalimi kuleli lizwe.
“Kuyacaca ukuthi isimo sokushintshashintsha kwesimo sezulu sizohlale sikhona. Okumele sikwenze ukufunda ukuthi singakhiqiza kanjani ngaphansi kwalesi simo. Abeluleki bezolimo kumele bathole ulwazi olwanele abazoludlulisela kubalimi ngezindlela zokuthola izimbewu nemfuyo ezikwazi ukumelana nesimo sezulu esingesihle,” kusho yena.
USolwazi Najjingo Mangheni wenyuvesi iMakere ese-Uganda, uthe abeluleki kumele kube ngabantu abazokwazi ukumelana nabalimi abangalimeli ukudla abalimela ukudayisa.
“Sisesikhathini lapho abalimi abasathuthuka besesigabeni sokwenyukela esigabeni esilandelalayo. Abeluleki kumele bakhule nabo, bakwazi ukuphendula imibuzo yabalimi abasesigabeni esilimela ukudayisa futhi abasemikhakheni eyehlukene yezolimo. Ngaphezu kwalokho ngokubona kwami, laba balimi kuzobe kungabantu abangesabi ukuphonsela uhulumeni inselelo uma bebona sengathi kunezinto ezingahambi kahle. Abeluleki nabo kumele babe ngabantu abazokwazi ukumelana nabo. Abantu abasha esigqugquzela ukuthi bangene kwezolimo bathanda ubuchwepheshe, kumele abeluleki bethu bakwazi ukubasiza, bakuhlomele ukuphendula imibuzo ngolwazi oluningi olutholakala ngobuchwepheshe, baqhamuke nezisombululo eziyizo,” kusho yena.