Bafuna kwenziwe uphenyo
IZINYUNYANA zothisha KwaZuluNatal zifuna kwenziwe uphenyo ngokuthi iyaphi imali yomnyango wezemfundo uma inqwaba yabenza umsebenzi nomnyango bengakhokhelwa.
Lokhu kungenxa yokungakhokhelwa kwabanye osonkontileka abathola ithenda yokuphakela abafundi kusuka ngoJulayi.
UMnuz Allen Thompson, iPhini likaMengameli weNatu, uthe sebebhalele inhloko yomnyango uDkt Enock Nzama befuna incazelo ngokuthi kungani imali ingakhokhiwe.
Uthe bathola izikhalo kothishanhloko ngokuthi osonkontileka abakhokhelwe selokhu bathola umsebenzi.
“Okubuhlungu wukuthi kukhona abafundi abalambayo ngenxa yokuthi umnyango awukhokhile. Yinqwaba yezikhalo esizitholayo ngokuthi abantu abakhokhelwe njengoba umnyango ungafaki ngisho imali yama-norms and standards (imali yokukhokha ugesi, amanzi nokulungisa izinto ezincane ezikoleni),” kusho uThompson.
Uthe okuxakayo wukuthi uma kuhambe umuntu izikhala azivalwa okusho ukuthi leyo mali iyongiwa.
UMnuz Bheki Shandu, iPhini likaNobhala weSadtu, uthe sebefuna kungenelele umnyango woMgcinimafa ukuze usize owezemfundo obukeka uxhuga.
“Sikhathazekile ukuthi kuhlale kuthiwa imali ikhona kodwa osonkontileka abakhokhelwa ngesikhathi. Sigqoma etsheni njalo uma sithi sikhuluma eyomnyango nokukhokha yingakho sithi akungenelele uMgcinimafa asize njengoba nomphathi wezimali wezemfundo emisiwe emsebenzini,” kusho uShandu.
Omunye wosonkontileka ongakhokhelwe eNewcastle, ocele ukungavezwa, uthe baningi abangakhokhelwe ezindaweni ezehlukene esifundazweni.
Uthe abasazi ukuthi benze njani njengoba bengatshelwa ukuthi kubambephi. “Ngithole ithenda ngoJulayi kodwa kuze kube yimanje angikaze ngiyithole imali, ngikwenze konke. Njalo uma kuqala inyanga sihambisa izinto zethu kodwa lutho imali. Ngiphakela izikole ezine, ngenyanga kumele ngabe ngithola imali engaphezulu kuka-R300 000 kodwa akungeni ngisho isenti. Ngenyanga ngisebenzisa ngaphezu kuka-R90 000 okukhona kuwo neholo labasebenzi abangaphezulu kuka-20,” kusho usonkontileka.
Ekhuluma kwiGagasi FM kungekudala, uNgqongqoshe Mthandeni Dlungwane, uthe uyazi bakhona abangakhokhelwe wathi imali ikhona.
Okhulumela uDlungwane, uMnuz Kwazi Mthethwa, uthe bazobheka ukuthi kubambephi kulabo abangakhokhelwe bese belungisa.