UMahlangu uphoqelekile ukuzocacisa
IPHINI leNhloko yamaJaji eselathatha umhlalaphansi, iJaji uDikgang Moseneke, kufanele ishayelwe ihlombe ngokushaya phansi ngonyawo ifuna ukuthi lowo owayenguNgqongqoshe wezeMpilo eGauteng, uNksz Qedani Mahlangu, azokwethula ubufakazi esigcawini okuphenywa kuso ngokuthi kwenzekani ngeziguli ezasuswa eLife Esidimeni.
UMoseneke ugcizelele ukuthi bonke abasebenzi abathintekayo ekushoneni kweziguli ezazigula ngengqondo ezingu-141, okubalwa noNksz Mahlangu, kuzomele baphendule ngokwenzeka.
Lezi ziguli zafa uMnyango wezeMpilo eGauteng uphethwe nguNksz Mahlangu yingakho kumqoka ukuthi azokwethula ubufakazi ngoba imindeni yalezi ziguli idinga izimpendulo.
UNksz Mahlangu uthumele umyalezo ngommeli wakhe ethi uzimisele ngokuzokwethula ubufakazi kodwa ucela ukunikwa isikhathi sokuphothula ukubhala eLondon School of Economics.
Nokho sekuvelile ukuthi lokhu akulona iqiniso. Okokuqala le nyuvesi ikuphikile ukuthi njengamanje kukhona abafundi ababhalayo khona kanti okwesibili ikuphikile nanokuthi uNksz Mahlangu ungumfundi wayo.
Ngesikhathi esula esikhundleni sokuba ngungqongqoshe ngasekupheleni konyaka odlule, uNksz Mahlangu wathi uyazisola ngokuthi kugcine kuphume imiphefumulo kube kunguyena ohola umnyango. Wathi futhi uyayeseka yonke imizamo yokulekelela imindeni yabashonile.
Sesifikile-ke leso sikhathi, akasigcine isethembiso sakhe ngokuthi azokwethula ubufakazi esigcawini esiphenya ngalesi sigameko.
Le mindeni idinga izimpendulo ukuze iqhubekele phambili nempilo ngakho kufanele uNksz Mahlangu azophendula ngezinqumo ayezithatha ngesikhathi ethi iziguli azisuswe eLife Esidimeni ziyiswe ezikhungweni ezingenzi inzuzo.
Lezi zikhungo azikhetha zazingakulungele ukunakekela iziguli futhi lena yinto eyayaziwa kodwa uNksz Mahlangu waphikelela ephula nomthetho weMental Health Care Act okhuluma ngokunakekelwa kweziguli ezigula ngengqondo nazo okufanele zinakekelwe ngendlela efanele futhi zihlonishwe. UNksz Mahlangu nalabo ayephethe nabo umnyango wehlulekile ukuzivikela lezi ziguli yingakho nje kumele bonke beze bazophendula.