Kungabe lalithini izwi labantu zingakafiki izinkolo eziningi?
INYANGA kaLwezi (Novemba) eqala kusasa ngizobe ngibuyela emsakazweni Ukhozi FM ohlelweni Ilizwi Labantu oluba njalo ngehora lesihlanu lize liyogamanxa ngeSonto ekuseni. Uhlelo lolu engethemba ukuthi inhloso yalo enkulu wukubheka emandulo ukuthi IZWI LABANTU lalithini izinkolo eziningi zingakafiki. Kodwa konke kungomlando nokulahleka kwawo ngezikhathi zawoSt Augustine. Umbuzo uthi ILIZWI lalithini kumuntu kanjalo nelakhe umuntu uqobo. Nokho esingeke sithi kwakuyinkolo yase-Afrika kodwa abantu nomsuka wabo ezikhathini zamandulo zaseGibhithe babekholelwa kukuphi. Kulapho umcwaningi nombhali uJohn Jackson encwadini iChristianity Before Christ ebalula khona ukuqala kwenkolo yobuKhrestu umsindisi uKhrestu engakabi khona.
Ezinkulumeni esengike ngazethula kulokhu ngizogxila kakhulu esizindeni seZALA. Inkulumo izokube ibhekise ezintweni esathi noma siphucwa ngendlovuyangena konke okwethu nathi sakuthatha sakulahla emini kwabha ezaleni. Sathi uma silahla kwaba yinkukhu nenja kuphela ezilwaneni zizonke ezabona ukuthi kukhona lokhu esingakubonanga esihambe sakulahla nomlotha ezaleni. Zifike zona zanuka wabona inja iququda khona lapho inkukhu yakuvuza ibiza ezinye ithi wozani nizobona isimanga sidleni nakhu bekulahlile abanikazi bengaboni. Kungakho namhlanje kunjena ngoba saphanjwa lapho sase silahla esacabanga ukuthi kubi kanti sesithatha lokhu osekusibinda namhlanje.
Lokhu kuyadabukisa ngoba akushayi kuphela umuntu esingabuye simthethelele ngokuthi akafundanga wagogoda kodwa ngisho nabantu abafunde bayikazela amajazi, abaneziqu zonke zasemanyuvesi. Lokhu kwenza ukuthi isitha somuntu kungabi ngomhlophe nowaseNdiya kuphela kodwa ngisho owakubo imbala isifundiswa sansondo. Baningi abantu bakithi esethembele ukuthi ngakube benza ucwaningo olunzulu ngezinto zethu zesintu abasemanyuvesi kodwa othola bemdibi munye nokuthi konke okwenzekayo asikho isidingo sakho sibuyisela abantu emuva. Amanyuvesi amaningi namhlanje asededele ukuthi imiqingo yezifundo zobudokotela neze-masters sezingabhalwa ngolimi lwethu lomdabu. Kodwa kukhona abasakubona bakubuke lokhu njenganento esephansi. Ukuveza isibonelo salokhu eminyakeni eyedlule embalwa iNyuvesi i-UKZN yathula ukuthi ulimi lwesiZulu seluzosebenza njengazo zonke izilimi kulesi sikhungo semfundo ephakeme. Namhlanje sesithola umnyango wezezifundo zengqondo nabo sebethula isikole se-Afrikology lapho kuzocwaningwa ngokusihluphayo okwehlula imithi yasentshonalanga.
Akukho lutho olusha uma usubheka olwafika nabaseNtshonalanga. Kunalokho bafunda kithina okuningi thina esasikugcine ngezwi lomlomo hhayi ngokubhala bona base bekuthatha bakubuyisa sekubhaliwe. Nakhu u-matric uhlalele izivivinyo zabo zokubhala zokuphela konyaka kodwa umbuzo uthi: ngakube laba bantwana bazophuma beya emanyuvesi beyizingane ezingamaAfrika ngokwase- Afrika noma bazobe bengama Afrika ngokomzimba kodwa ngokwemfundo bengabaseNtshonalanga?
Namhlanje asinazibaya saphucwa umhlaba namathuna, esinakho kuncike komhlophe. Ngo-1994 sajatshuliswa ukuyohlala nabo esilungwini esesithe uma sesifuna ukuhlaba kwathiwa thola imvume kuqala, uma uthi uyabheka yibona kanye abakuqaqele njengomakhelwane abamhlophe kodwa ufundile njalo wagogoda ungudokotela nobusolwazi namajazi akho usufana nesinxibi, ngokwalahlwa yithina ezaleni sakubiza ngenhlamba yethunzi elimnyama.
Enye yezimbongi zaseAfrika encwadini Imfihlo Yomthandazo inkondloza ngemfihlo yomthandazo ukuthi uyothandaza liyoshona kodwa limile izwi: “kuphi owakulahla ezaleni”. Namhlanje simatasa siphuma singena sixakwe ukwelapha umsamo, inkinga konakelephi ngoba siyaphuma sifundile, sinemali, siyaya ezinkonzweni, sithandaze kodwa isikweletu silokhu simile: nanto ibhange ngomuzi walo nemoto ohamba ngayo, ayiphele inyanga uhluleke ukukhokha zingene izingcingo. Ingane sezagcinelwa wonke amafa esiwasebenzayo: ukhona osazi ngesangcobe? Izolo lelo.
Incwadi Umsamo Iziko Lamathongo isibuyekezwe kabusha isiphume nesahluko esizimele: esibhekene nokuchaza ngokonakala nokwelashwa komsamo. Kanti Incwadi Umsamo Nezibi zeZala elanda ngesakulahla ezaleni isesezandleni izobonwa yilanga ngoMashi ngonyaka ozayo. ASIPHAHLE Iphi inyuvesi yase-Afrika eyokwethwesa izifundiswa zakithi izikhumba zezingwe nezamabhubesi kunezevatho zenzila emnyama? Bhedlindaba 033 5691317/ 0797471911/ 0728792001