Izinhlungu ezihlukumeza ngezansi
BENGIHLELE ukuthi ngizobhala ngengozi yotshwala ekukhuluphaliseni nasekubandiseni umzimba walabo ababuphuzayo. Lokhu kusho ukuthi uma umlingani wakho ekhala ngokuthi usuyabanda uma sekufikwa le nalena; kumele ukhumbule ukuthi utshwala bunomthelela omkhulu ekwehliseni izinga lokushisa komzimba wakho. Kodwa isimo engisibonayo nsuku zonke, asivumanga ukuthi sikhulume ngabo.
Ngihlala njalo ngimangazwa izinga lezinhlungu ezihlukumeza esingezansi kubantu bakithi, lapha ngikhuluma:
Ngokuqaqamba nokubuza kwezinyawo.
Ubuhlungu bemilenze, izicubu namathambo akhona.
Ukukhonkeka komfasankomo (ingemuva ledolo), ikakhulukazi umsipha wawo lona ophakathi nendawo nemisipha esemaceleni.
Ubuhlungu obungezansi kwedolo (tibial plateau) obuqaqamba kube sengathi kuhlakazeka phakathi ithambo; kwesinye isikhathi bubelesele endaweni eyodwa kube sengathi yimikhonto esho ingayeki.
Nobuhlungu obugwaza phakathi nedolo, kungathi idolo lihlukana phakathi, idolo liqhume, lisike sengathi insingo, libopheke kungahambeki.
Ngobuhlungu obuba phakathi nomlenze, buhlanganisa izicubu nethambo lakhona uqobo.
Ubuhlungu obuguduza inyonga ngaphandle nangaphakathi, kwesinye isikhathi bunkonkoshela lapha emaceleni neqolo, buhlale bubelesele kube sengathi kunegejazembe elilokhu ligengcile
Ngezinhlungu ezihlasela uhlangothi zihlanganise nesinqe nenyonga.
Ngezinhlungu ezibamba isinqe sonke, kungahlaleki, kungasukumeki; kube buhlungu ekupheleni kwezinqe, kwehle njalo nengemuva lethanga kuze kuyofika onyaweni uqobo. Lapho umlenze uba buhlungu, kungahambeki; abanye bagcina behanjiswa ngezinqola okanye bancenge ngezinduku.
Zonke lezi zinhlobo zezinhlungu zijikeleza ekugangathekeni kwemizwa enhlobonhlobo elinyazwa yizimo ezehlukene. Ake sithathe nje ukutshutshumba kwezinalithi zobuhlungu okuba sezinyaweni. Lobu buhlungu budalwa ukulimala kwemizwa esezinyaweni nezindawo eziseduze nazo. Lokhu kungadalwa: Yisifo sikashukela Isifo esibangwa yigciwane iHIV Umfutho wegazi ophezulu Ukulimala kwemizwa okungazeki imbangela yakho.
Imizwa esonqenqemeni (peripheral) lomzimba iyathanda ukuhlaseleka ilimale kakhulu. Lapha sikhuluma ngemizwa esizinyaweni, emilenzeni nasezingalweni; yingakho uthola njalo ubuhlungu kulezi zindawo zale mizwa.
Izinhlungu ezinyaweni nasemilenzeni zihambisana nokubuza kwezinyawo, ukuvuvukala, izinalithi ezigwazayo, izinyawo okungathi zifakwe isokisi, ukushisa kwezinyawo nemilenze kwabanye kuze kushiye nezibazi esikhunjeni. Isikhathi esiningi abantu basuke benezinye izifo, izifo lezo ezithinta izinso. Uyaye uthole ukuthi imilenze nezinyawo sekushintshe kakhulu ngombala sekugqunqe kakhulu uma ukuqhathanisa naphambilini. Izinhlungu nazo azizibeki phansi. Kulapha-ke uyaye uthole abantu sebekhala ngokuthi baloyiwe. Kuyedlulela ume kuke kwavela isilonda, nokwenza isilonda esiqhamuka ngenxa yokulimala kwemizwa sibhebhetheka kalula ngenxa yokwehla kwegazi elifinyelela kuleyo ndawo okumbondelana kukadoti ongasakwazi manje ukushushumbiswa uyokhishwa ngenxa yemizwa engasasebenzi kahle. Izilonda lezi ngaphandle kokubonakala ngaphandle, zisuke zijulile kakhulu ngaphakathi yingakho uyaye uthole abanye sebenqanyulwa unyawo, okanye umlenze kwesinye isikhathi kuze kunqanyulwe le ngaphezu kwedolo. Yilesi simo engiyaye ngicabange ukuthi thina njengodokotela asibi nalo uzwelo nokunakekela okwanele. Ngani? Zikhona izilonda ezithi noma zibukeka kabi ngaphandle, ezinye sezinuka iphunga elibi; uthole ukuthi uyakwazi ukungena ngaphakathi uzikwapulute ngempumelelo lezi zicubu ezisuke sezibolile zonakele, asinde umuntu lowo ekunqanyulweni isitho okanye izitho zakhe. Kwesinye isikhathi kuba yindlela esikhuluma ngayo singodokotela nesiguli esidinga le ndlela yokwelashwa, eyenza izinto zibe nzima. Akuyona into elula nakunoma ngubani ukuthi ukade uzazi unezitho eziphelele iminyaka ngeminyaka, bese ngehora elilandelayo isimo sesishintshile; sekumele uhambe ngezinduku okanye ngenqola. Yile minjunju yemicabango egcina yenze abaningi bacabange ngokuthakathwa; okulandelayo ukuyofuna olunye usizo olungenye indlela ukuze bakubalekele ukunqunywa izitho zabo. Inselelo kuba wukuthi ngaleso sikhathi amagciwane ayangena, andele egazini ukugula kuye phambili. Angagcina nalowo ogulayo ingqondo yakhe ingasasebenzi kahle, esehhuma nje.
Ngicela ukuphinde ngigcizelele ukuthi inselelo isenkulu ezinhlungwini zesingezansi ezithinta amanyonga, izinqe nengemuva lethanga. Ubuhlungu bamathambo asemanyongeni, lawa akake ijoyonti ngaphakathi ngasemvilaphini nangaphandle enqulwini busaletha ukukhinyabezeka okukhulu kubantu bakithi. Lobu buhlungu bulekwa ubuhlungu beqolo, umgogodla e naleli thambo elikake iqolo elivele libanike imikhonto yobuhlungu ngapha nangapha. Lubu buhlungu bala mathambo benziwa yimizwa, nokuvuvukala kongwengwezana oluzungeze la mathambo. Ubuhlungu lobu buyelapheka kodwa kudinga lowo owelashwayo abe seduzane ukuze athole usizo ngokuphelele, ngoba uma kugqagqana ukwelashwa, imishanguzo ayizweli kahle kube sengathi siqala phansi njalo uma elashwa. Lokhu kuyefana nokwelashwa kobuhlungu bezinqe kuhlanganisa nobuhlungu obehla ngemuva kwethanga obuhamba buyofika ezinyaweni.
Enye inselelo wukuthi ubuhlungu benyonga buyathanda ukuhambisana nobuhlungu emihlubulweni nasezinhlangothini. Kwabanye kugcina kuwelele nasesayidini lengalo nentamo yakhona. Odokotela bayezelapha lezi zinhlungu, nanoma imishanguzo yazo ithanda ukuluma ephakatheni kodwa lokho ngeke ukuqhathanise nokukhubazeka kokugcina ungasakwazi ukuhamba, nokuhlala ngezinqe. Mpilonde!