Uqophe umlando efaka isikole kowamasiko
UTHEMBISA imiklomelo emikhulu uthisha wesikole samabanga aphansi eSiphingo ovuse umculo kulesi sikole, abafundi babuya nezindondo.
UMnuz Linda Makhathini, ofundisa eWindy Heights Primary, uqophe umlando ngokufaka isikole emncintiswaneni wamasiko. Abafunda kusona sebezomela isifundazwe eGauteng. Bekuqala nonyaka ukuthi isikole singenele imincintiswano kodwa sagila izimanga ngemuva kokuthi uMakhathini evuse umculo nokuhaywa kwezinkondlo esikoleni. Abafundi okunguMelokuhle Cele (8) noSphesihle Mkhize (14), bazomela isifundazwe kwiTalent Africa Competition eRoodeport Theatre, eGoli ngo-Ephreli ngonyaka ozayo.
UMakhathini, obedume ngomculo wamakhwaya ezikoleni abefundisa kuzo, uthe ufike nonyaka eWindy Heights.
“Ngifike ngathola ukuthi bekungangenelwa mincintiswano kulesi sikole ngazibophezela ukwenza okuthize. Ngiqale ngafundisa indlamu, amahubo, amaculo omshado nezinkondlo uma sekuphume isikole. Yize ngiwumuntu womculo wamakhwaya ngibone kungcono ngiqale ngalokhu okuqhakambisa amagugu ethu,” kusho uMakhathini.
Abafundi bakhe baqale bangenela umncintiswano wamasiko namagugu owenziwa uMnyango wezeMfundo nakhona baphuma phambili bamela isifunda saseMlaza, ngo-Ephreli.
Babuye bangenela umncintiswano iTalent Africa okuhlabane kuwona uSphesihle ofunda uGrade 7 noMelokuhle okwaGrade 3. Bawine emunxeni wePraise Poetry.
UMakhathini uthe ubevele azi ukuthi abafundi bakhe bazowina ngenxa yendlela abazimisela ngayo. Kulo munxa bebengenele ngabodwana babashaya amakhanda abafundi abangaphezu kuka-50. Njengoba bezomela isifundazwe eGoli ngonyaka ozayo, kumele bathole amaphoyinti angu-95 ukuze bayomela i-Afrika emncintiswaneni iTalent America eBroadway ngoJulayi.
“Kulokhu bathole amaphoyinti angu-83. Sizosebenza kanzima ukuze bathole amaphoyinti adingekayo ukuze bayomela i-Afrika phesheya. Besizilolonga nangesikhathi sekhefu esikoleni,” kusho uMakhathini.
Inselelo ababhekene nayo wukuthi uSphesihle uzobe esekwesinye isikole ngonyaka ozayo njengoba eseyokwenza amabanga aphezulu. UMakhathini uthe bazoxoxa nothisha besikole azobe ekusona babacele ukuba bamdedele uma sekumele aye eGoli. Uthe okuhle ngomncintiswano wukuthi awuncikile esikoleni kodwa ngowezikole zonke. Uthe ngisho kumele aye phesheya yiWindy Heights ezolungiselela uhambo lwakhe.