Baphi kwezasekuseni nezantambama?
ABASAKAZI abaningi bakutshela ukuthi iphupho labo wukwethula uhlelo lwasekuseni noma olwantambama phakathi nesonto.
Lezo zinhlelo zithandelwa ukuthi isikhathi esiningi kuba yizo ezilalelwa kakhulu ngoba ekuseni abantu basuke bevuka okanye besendleleni eya emsebenzini nanoma yikuphi lapho belibangise khona.
Olwantambama abantu basuke sebebuyela emakhaya abanye sebefikile emakhaya njengabafundi.
Phakathi nosuku abakwazi ukulalela kahle kuba yilabo abasebenzela emahhovisi, abangasebenzi, isezitolo okanye kube yilabo abasuke besemgwaqweni belalela ezimotweni.
Sike saqaphela nozakwethu ukuthi babukeka besadonsa kanzima nokho abesifazane kulezi zinhlelo eziyintandokazi.
Yimuphi nje umsakazo ofika emqondweni ogabe ngomuntu wesifazane ekuseni? Kunalokho baba ngabasizi babasakazi bamadoda okuba yibo abasuke beshayela uhlelo.
Bheka nje emisakazweni embalwa ezinhlelweni zasekuseni kuphethe abesilisa. KuKhozi FM uDJ Sgqemeza uzihambela yedwa, kwiRadio 2000 uhlelo ngolukaJust Ice, kuMetro kukhonya uDJ Fresh, kwiVuma uMakhosi Khoza kuthi kwiGagasi FM kube wuMzokoloko. Nantambama yinto efanayo. Kuze kusize i-5 FM eyethembe uThando Thabethe ngalo msebenzi ngo-3 kuya ku-6 nohlelo iThe Thabooty Drive. Ulekelelwa nguMsizi James oke wayibamba kwi-East Coast Radio phambilini.
Ngiyazibuza ukuthi ngabe kwenziwa yini ukuthi abesifazane bazitshwe ezinhlelweni ezibalulekile emsakazweni.
Ngabe bona azibafanele na? Noma ingabe abekho abanethalente kubona abangakwazi ukuzenza?
Nakhu uThando wenza umsebenzi oncomekayo ohlelweni lwakhe nengikholwa wukuthi ngeke kube nenkinga uma neminye imisakazo ingasika iphethini.
Kwesinye isikhathi uyabadinga abaphathi abazothatha izinqumo bengalandeli okwakwenziwa phambilini kodwa bashintshe izinto.
Bheka isinqumo sokufaka umuntu onjengoSelby Mkhize ohlelweni lwantambama kuKhozi saba nompphumela omuhle kanjani? Kuthiwa iWoza Nabangani Bakho ngolunye lwezinhlelo ezenza kahle emsakazweni.
Iqiniso wukuthi kusekhona abantu abangayizwa indaba yezitabane kodwa ukuqunga isibindi kwabaphathi boKhozi kwabasebenzela.
Nakulokhu abaphathi ababafake abesifazane kubonakale ukuthi kuzokwenzekani.
Ungangibhalela ku-fanelesibonge.bengu@inl.co.za noma kuTwitter @fanelebengu noma ku-Instagram @fanelebengu