Imizamo yokuxazulula eyokugcwala emadolobheni
IZOQHAMUKA nezixazululo zezinkinga zokugcwala emadolobheni ingqungquthela eqale izolo eThekwini ehlanganise izinhlaka ezehlukene kuhulumeni nezizimele.
Ngengqungquthela i-Urban Week, ezophothulwa ngoLwesihlanu eMoses Mabhida, kuhloswe ukudingida zonke izinto ezithinta ukuthuthukiswa kwezindawo ezisemadolobheni. Ekhuluma neSolezwe engxoxweni ekhethekile uNksz Kota Fredericks, oyiPhini likaNgqongqoshe wezokuHlaliswa kwaBantu kuzwelonke, uthe bathathe isinqumo sokuba nengqungquthela ngoba bebona izinselelo eziningi.
“Sithathe lesi sinqumo sineminyango eminingi ehlukene ngoba asikwazi ukuzixazulula sisodwa izinkinga ezisemadolobheni. Sinezinhlelo eziningi zokuthuthukisa izindawo ezisemadolobheni yingakho sisebenzisana nezinhlaka ezizimele ukuze kusheshe,” kusho uNksz Fredericks.
Phakathi kokuzodingidwa kule ngqungquthela kubalwa nengwadla yokwanda kwemijondolo ezindaweni ezisemadolobheni. UNksz Fredericks uthe bafuna kushaye u-2030 isinciphile imijondolo emadolobheni.
“Okubalulekile ukuthi abantu abahlala emijondolo basuswe babekwe ezindaweni ezifanele. Uma sixazulula inkinga yemijondolo kumele sibhekele nabokufika nabantulayo. Bangu-61% abantu abahlala emadolobheni, yingakho omasipala bebodwa bengeke bazixazulule izinkinga kodwa sidinga zonke izinhlaka zibambisane,” kusho yena.
Uthe banethemba lokuthi ingqungquthela izophela sebephume nomhlahlandlela ekuxazululeni izinkinga nokuthuthukisa izindawo ezisemadolobheni. Ungqongqoshe uthe bebelindele izithunywa ezingu-150 komasipala nasemadolobheni amancane kodwa izolo kufike abangaphezu kuka-200. Uthe lokhu kukhombisa ukuthi abantu bazimisele ukusebenzisana ukuthuthukisa amadolobha.
Kule ngqungquthela kuzophinde kukhulunywe nangezokuphepha njengoba kuhloswe ukuthi kuncishiswe ubugebengu emadolobheni.
Izolo bekubhekwa isimo somnotho emadolobheni amakhulu namancane kubhekwa nezindlela zokuwuthuthukisa.
Namuhla kuzogujwa iWorld Cities Day lapho kugqugquzelwa ubumbano emadolobheni ehlukene emhlabeni jikelele. Izithunywa ezethamele ingqungquthela zizothola ithuba lokuzungeza idolobha zibone uhlobo lwezokuthutha eThekwini. Kusukela kusasa kuze kushaye uLwesihlanu, kuzoba nenkundla yokucobelelana ye-African Forum on Urban Safety lapho izimeya zamazwe ase-Afrika zizohlomisana ngolwazi nangamasu okwenza amadolobha aphephe. Ezinye izinhlaka ezikule ngqungquthela yiSouth African Cities Network, uMnyango wezokuBusa nokuBambisana nobuHoli boMdabu kuzwelonke, umnyango kaMgcinimafa, uMasipala weTheku izolo obumelwe yiMeya uNkk Zandile Gumede, yiSouth African Local Government Association neSouth African Council for Planners.