UKomphela uhlabeke umxhwele ngoZulu
UHLABEKE umxhwele ngoPhilani Zulu umqeqeshi weKaizer Chiefs, uSteve Komphela, athe ufike wayibamba ishisa ngasohlongothini lwesokunxele emuva ngemuva kokulimala kukaTsepo Masilela oseyinkunzi emidwayidwa kule ndawo.
Abaningi uZulu babemthatha njengomdlali wasesiswini esadlala kwiMaritzburg United kodwa uKomphela ukhombise zibekwa emidlalweni yokuvivela isizini ukuthi umbona engumdlali ongasiza kakhulu emuva.
Kuthe kungalimala uMasilela, uZulu wafika wayibamba kule ndawo lapho ebonakala eya ngokukhula.
UKomphela ebuzwa ukuthi ngabe uMasilela usayoyithola yini indawo yakhe uma esebuya, uveze ukuthi impela sekuyomele acabange ajule ngaleso sinqumo.
“UZulu unginika umfutho nejubane kanti kuTsepo uthola umqondo. Sifuna ukuthi uMageba athi ukuntshontsha kancane umqondo kuTsepo bese ewusebenzisa nalo mfutho anawo. Uma enze njalo uyobe uthole inqokonqoko yomdlali. Ngebhadi ke ngeke ukwazi ukuthatha umfutho wakhe uwufake kuTsepo ngenxa yeminyaka. Kuzobonakala, impela umbango uzoheha,” kusho uKomphela. Umqeqeshi ubekhuluma ngempelasonto ngemuva kokuthi iqembu lakhe lithele phansi AmaZulu ngo 3-0 emdlalweni weTelkom Knockout Last 16, eMoses Mabhida Stadium, eThekwini. Kusihlwa bazoqhuthana nePolokwane City koweligi ePeter Mokaba Stadium ngo-7.30 ebusuku. Kubonakala kulezi zinsuku kumsebenzela ukusebenzisa indlela yokudlala i-3-5-2 lapho egabe ngoZulu noJoseph Molangoane ezinhlangothini, elokhu ebathuma ukuthi bashoshele kodwa babuye bazovala nasemuva.
Uthe ubona iqembu lakhe liya lisibamba lesi sitayela yingakho eseba nokukhululeka uma laba beya phambili. Wenze isibonelo ngomqeqeshi weChelsea, u-Antonio Conte, ngesizini yakhe yokuqala osebenzise i-44-2 emidlalweni yokuqala yeligi kodwa ngemuva kokuthola induku washintshela kwi-3-5-2.
“Kancane siya ngokuvuthwa. Ngesikhathi sizithola endaweni ebucayi ngemuva kokulahlekelwa uRama (Ramahlwe Mphahlele) noKgotso Moleko, sizame okuhlukile futhi sibe sisebenzisa umqondo. Manje sengiya ngokukhululeka ngokuthi singamdedela uTight (Molangoane) noPhilani ngoba ngiyabona ukuthi abadlali bethu abathathu basemuva baqinile. Sizolokhu siya ngokukhula ngaphandle kokuzikhukhumeza,” kusho uKomphela.
Ngempelasonto kunemidlalo yeTelkom Knockout lapho iChiefs izobhekana neChippa United eNelson Mandela Bay Stadium, ngeSonto ntambama.
Imidlalo yeTelkom Knockout (quarterfinal):
NgoMgqibelo: Platinum Stars v Bloemfontein Celtic (Royal Bafokeng Stadium, 3.30pm); Orlando Pirates v Polokwane City (Orlando Stadium, 8.15pm); Bidvest Wits v Baroka FC (Bidvest Stadium, 8.15pm)
NgeSonto: Chippa United v Kaizer Chiefs (Nelson Mandela Bay Stadium, 3.30pm)