Kusalilwa ngabaculi abadlule emhlabeni
KUKHALWA zinkalo zonke ngokudlula emhlabeni kwenkakha yomculo we-jazz uTheo Bophela nendodana yomculi kamaskandi uPhuzekhemisi, uMagugu Mnyandu.
UNgqongqoshe wezobuCiko namaSiko KwaZulu-Natal uNkk Bongiwe SitholeMoloi uthe ushaqekile ngokudlula emhlabeni kwala maciko.
“Egameni lomnyango, imboni yezobuciko nakubantu baKwaZulu-Natal, ngithanda ukudlulisa amazwi enduduzo emndenini, kubangani nakubalandeli bakaBophela noMnyandu.”
UBophela ushone ngoMsombuluko kwakhe eNanda kanti indodana kaPhuzekhemisi, uMagugu idlule emhlabeni engozini yemoto eyehlele eManzimtoti.
Namhlanje eBat Centre, eThekwini, kuzokuba nenkonzo yesikhumbuzo sikaBophela kusukela ngo-2 ntambama. Inkonzo yomngcwabo izokuba se-UCC Congregational Church eNanda Mission, ngoMgqibelo. UMagugu uzofihlwa ngosuku olufanayo emathuneni asekhaya ngemuva kwenkonzo ezokuba sezinkundleni zemidlalo zaseNkanini Primary eduze kwaseMkhomazi.
Khonamanjalo, nomculo wesicathamiya usugqemeke udume lwengozi ngokudlula emhlabeni kwelungu leRoyal Messengers, uMzwandile Mncube waseMcebo, KwaNongoma.
UMzwandile kuthiwa ushonele esibhedlela saseMlaza, iPrince Mshiyeni Memorial ngoLwesihlanu ngemuva kokuphuthunyiswa khona exinwe yikhanda. Umholi weRoyal Messengers uMbhekiseni Khumalo uthe balahlekelwe ngoba uMncube nguye obesewumgogodla waleli qembu.
“Lo mculi ushona nje, bekunomcimbi ebesiwuhlelelwe ngabalandeli beqembu eSiphambanweni, KwaNongoma, ngalo Mgqibelo (Novemba 4). Bebefuna ukugubha nathi impumelelo yeqembu,” kusho uKhumalo.