I-IFP ayisamukele isinqumo esithathwe uShenge
LO nyaka uyobalwa neminye eyaba nezigameko ezinkulu ezenzeke kwezepolitiki eNingizimu Afrika. Kumanje iqembu elibusayo livivela ukukhetha ubuholi obusha engqungqutheleni ezoba ngoDisemba.
Ibhekwe ngabomvu le ngqungquthela, hhayi ngamalungu e-ANC kuphela kepha yizwe lonkana.
Esinye isigameko esibhekwe ngabomvu ekupheleni konyaka wukungena komholi omusha esikhundleni ebesiphethwe yinkosi Mangosuthu Buthelezi osanda kumemezela ukuthi usethi khumu ekubeni ngumengameli weqembu alisungula Inkatha Freedom Party.
UButhelezi ubesehole leli qembu iminyaka engu-42, kusuka alisungula ngoMashi 21, 1975.
Njengoba esehole iminyaka emingaka, i-IFP ibisinguyena ngoba uyazi ukusuka nokuhlala.
Kwaziwa nguye okulilungele nokungalilungele iqembungo kwemigomo nenhloso yalo.
Kwenye inkathi kuyaye kube nzima ukwamukela uguquko, ikakhulukazi uma lungakaze lwenzeke.
Kepha sinxusa amalungu e-IFP ukuba asamukele isinqumo sikaButhelezi njengoba kulindeleke ukuthi kukhethwe umengameli omusha engqungqutheleni yaleli qembu okuzokhethwa kuyo ubuholi ekupheleni konyaka.
Kasilindele ukuthi ngokuphuma kwakhe ekuholeni iqembu bese kuqala izinxushunxushu zokubangwa kwesikhundla.
Uma sibangwa lesi sikhundla, lokho makwenzeke ngendlela ephucuzekile futhi ehloniphekile.
Isihlava esihlasele KwaZulu-Natal sokubangwa kwezikhundla zezepolitiki kuze kuphume imiphefumulo, sengathi singangayihlasela i-IFP.
Sengathi iqembu lingakwazi ukuqoka ubuholi ngokuthula, uma kunokungaboni ngaso linye kuboniswane ngokuthula hhayi ngobudlova nobundlavini.
Silindele ukuthi iqembu liqhakambise ukuthuthukisa impilo yabantu baseNingizimu Afrika, libhekane nezinselelo ezinjengobubha, ukwentuleka kwemisebenzi nokulwa nobugebengu.
Silifisela ukuthula nenqubekela phambili iqembu.