Kuwubuhlathi okwenziwa yiSafa
MHLELI: Buvele obala ubuhlathi nenkungu egcwele enhlanganweni ephethe ibhola eNingizimu Afrika iSafa.
Lokhu ngikushiso yindlela okuvotelwa ngayo igoli lonyaka engibona ukuthi ayishayi emhloleni. Phela lo qethu wale ndoda yakwaMasuluke, u-Oscarine, alikho igoli okwakumele liqhudelane nawo. Angiqondile ukuthi elikaSiphiwe Tshabalala lalingekho ezingeni kodwa elikaMasuluke laba lihle ngendlela exakile.
Leli goli elingatholanga lutho la kwelakithi laze labonwa nangamazwe omhlaba kodwa eladla umhlanganiso kule Safa yethu alibonwanga nangokhalo. Ngokubona kwami kumele igoli lonyaka livotelwe yizingwazi ezadlala ibhola kuphela noma kube nesigungu esibekelwe lowo msebenzi kuphela ngoba abalandeli bavota ngothando lweqembu hhayi ngobuhle begoli.
Uma iSafa izoqhubeka nokuthi akuvotwe kanje ngeke nangephutha igoli elihle liqhamuke kula maqembu anabalandeli abancane. Ukuba iSafa ayibuthaka ngabe uMasuluke waphelezelwa yizikhulu zayo ngesikhathi eya phesheya emiklomelweni yeFIFA kodwa ngoba uphuma eqenjini elincane akwenzekanga lokho wahamba nabangadumile kangako ebholeni. Nakuba lingawinanga igoli lakhe kodwa ibhola laseNingizimu Afrika uliphakamisile. Namazwe abengasinakile azoqala manje asibheke ngelinye iso hleze ngelinye ilanga singabona unozinti omnyama eyodlala phesheya ngenxa yakhe belu uMasuluke.
Ukube kuya ngami, iSafa bekumele yenzele uMasuluke isiphihli sedili imbonge ngokugqamisa iNingizimu Afrika. Nohulumeni imbala bekufanele uyibonge le nsizwa kodwa phela mhlawumbe basahlela. Mbongiseni Dlamini ENEWLANDS WEST