Uphonsele inselelo abashayisibhakela
UPHROMOTHA wesibhakela waKwaZulu-Natal, uZandile Malinga, uphonsele inselelo abashayisibhakela esifundazweni ukuthi balithwale ijoka lokuletha izicoco zaseNingizimu Afrika.
I-KZN kumanje ishaya ngompetha oyedwa kuphela waseNingizimu Afrika okunguThabiso “The Rock” Mchunu osanda kulibuyisa ibhande le-SA cruiserweight emuva kweminyaka alishiya phansi, waqala umkhankaso wokulwela awomhlaba. Emasontweni edlule kuvele ukuthi obe ngumpetha we-SA middleweight, uChristopher Buthelezi, usephuciwe ibhande ngenxa yokwentula impi yokulivikela.
UMalinga weStarline Boxing Promotions onguphromotha wesifazane, uhlele izimpi ngokuhlanganyela nabanye bakulesi sifundazwe ngokusizwa wuMnyango weZemidlalo. Zizoba ngoMgqibelo nangeSonto e-Olive Convention Centre, eThekwini.
Kuzohlanganiswa isigaba sama-amesha nesikhokhelayo. Kuzoba ngokwesithathu uMnyango weZemidlalo ufaka isandla enhlanganiseleni yophromotha iminyaka ilandelana.
“Lezi zimpi ziyasiza kakhulu ngoba ziyaliveza ikhono labashayisibhakela. Inhloso yethu wukukhiqiza ompetha. Abanye abavele kulezi zimpi badlulele ezilinganisweni zeBoxing South Africa (BSA). Lokho kusho ukuthi bafinyelela ethubeni lokulwela izicoco zakuleli,” kusho uMalinga.
“Njengoba esifundazweni silahlekelwa ngompetha, sibheke kubona laba bashayisibhakela ukuthi basiwinele izicoco zaseNingizimu Afrika nezinye. Sifuna balwe ezisindweni ezifanele, baqhubekele phambili ukuze isifundazwe sizoba nompetha. Okwethu wukubanikeza ithuba.”
Zingu-16 izimpi zesigaba esikhokhelayo ezizobukwa ngabathandi besibhakela ezinsukwini ezimbili e-Olive. Kubashayi sibhakela okubhekwe ukuthi bajabulise abantu ngesibhakela esinenkosi phakathi kukhona uSiphiwesakhe “Piwe” Kunene waseMnambithi ozobhekana noTritity Mhlongo waseMandeni kwenye yezimpi ezibhekwe ngabomvu.
Ngaphandle kwesibhakela, kuzoba nomcimbi wokuvalelisa uSiboniso “Tiger” Gonya oyolwela ibhande leWorld Boxing Organisation (WBO) bantamweight nomakadebona uZolani Tete wase-Eastern Cape. Impi izoba ngoNovemba 18 e-United Kingdom.
Ngaphezu kwalokho abathandi besibhakela bahlelelwe umculo kamaskandi ozobajabulisa. NgoMgqibelo bazojatshuliswa nguKhuzani kuthi ngeSonto bathokozele umculo weGcokama Elisha.