Akanazo izinhlelo zokushiya iChiefs
AKANAZO izinhlelo zokushiya iKaizer Chiefs, uJoseph “Tight” Molangoane, obuyelwe yifomu selokhu enikwe ithuba lokudlala.
UMolongaone uke wangabonakala isikhathi eside ekuqaleni kwesizini okuqubule izinsolo zokuthi kungenzeka abone afika ngayo uma sekuvulwa iwindi lokuhwebelana ngabadlali ngoJanuwari. Ubuye washaya into ecokeme Amakhosi ebhuquzisa iMamelodi Sundowns ngo 2-1 eLoftus Versfeld Stadium, ePitoli. NgoLwesibili uphinde waqokwa njengomdlali ovelele iChiefs idlala ngokulingana ngo 0-0 nePolokwane City.
“Abantu bahlale bekhuluma, uma ungumuntu yinto okumele uyamukele leyo. Ukuthi ngizoshiya iqembu Uhlale engikhuthaza, ngakho ngizimisele ngokuqhubeka nokusebenza kanzima. Kuyangijabulisa ukuthi abalandeli bayayithanda indlela engidlalayo,” kusho uMolangoane. Mosimane, ocija Abafana Ba Style, waphumela obala ngokuthi uMolangoane ubefuna ukwephula umdlali wakhe uKhama Billiat. “Angiyazi leyo nto futhi angifuni ukugxila kuyona. Empilweni kumele ukwazi ukwamukela izinto ezimbi nezinhle. Ngakho nami nginendlela engibhekana ngayo nezinto ezimbi ezishiwo kimina noma ngami. Into emqoka kimina wukwenza kahle ngisize iqembu linqobe izicoco.”Njengamanje udlaliswa njengomdlali oyibamba ngakwesokudla emuva kodwa obuye ashintshe abe ngowaphambili uma iqembu selihlasela. “Mina akungikhathazi ukuthi ngidlala kuphi. Noma yikuphi lapho okuthiwa angidlale khona ngizozinikela. Njengamanje umqeqeshi ungidlalisa le ndawo engiyidlalayo futhi anginankinga nayo. Okumqoka kimina wukudlala njalo futhi ngeneme ukuthi lokho kuyenzeka.”NgeSonto ngo-3.30 iChiefs izobhekana neChippa United eNelson Mandela Bay Stadium, eBhayi kowe-quarterfinal yeTelkom Knockout. Amakhosi aphethe izicoco eziningi zeTelkom Knockout (ezingu-13) agcina ukunqoba lesi sicoco ngo-2010. IChiefs sekuphele amasizini amabili nohhafu ingawini lutho. Igcine ukuphakamisa isicoco ngo-2014/2015 idla ese-Absa Premiership neseMTN 8.