UMere ubalula okuthikameze ezakhe
UKAPUTENI wePlatinum Stars, uVuyo Mere, ukhala ngokushintshwa kwabaqeqeshi nokudedelwa kwabadlali abanamava abona ukuthi yikona okulibuyisele emuva leli qembu.
IDikwena isemaqenjini abejwayele ukushubisa umbango wesicoco se-Absa Premiership nokuwina izindebe kumasizini edlule. Nokho konke kubukeka sekuwumlando kusukela ngesizini edlule.
IPlatinum imangaze iningi ixosha umqeqeshi uCavin Johnson nephini lakhe uWillem Jackson obeneminyaka esebenza kuyona. Ngaphandle kwalokho azivuselelwanga izinkontileka zabadlali abanamava okukhona kubona uNdumiso Mabena oseyibamba kwiBloemfontein Celtic, Henrico Botes osekwiUniversity of Pretoria, Tintswalo Tshabalala noSolomon Mathe.
Izintambo zokuqeqesha iStars ziphonselwe uRoger de Sa nephini lakhe uMilton Dlamini. Isizini ka-2017/2018, iqalwe nguPeter Butler kodwa washeshe wakhonjwa indlela.
Kusukela kuqale isizini iDikwena ayikaze iwine nowokubika umdlalo kwiPremiership.
“Ukushintshashintsha abaqeqeshi nokudedela abadlali abanamava kuliphazamisile iqembu. Uyazi ukuthi ukwakha iqembu kuthatha isikhathi. Kufanele sisebenze ngesinako manje. Singabadlali bebhola, asikwazi ukubhekana nezinto ezenzeka emahhovisi.
“Noma ngabe yimuphi umdlali ofika kwiPlatinum kufanele alisebenzele ibheji leqembu. Lena yimpilo yethu, uma sigawulwa yizembe abanye bazophelelwa yimisebenzi,” kusho uMere.
“Kubuhlungu ukubona isimo esikuso. Ukuzithola sikulesi simo akwehli kahle kimina. Kodwa lesi yisimo esikuso, sizifake thina kusona. Kufanele sisebenze kanzima, ikakhulukazi abadlali abadala usisize abasha ukuze siphume kulesi simo.”
Ngaphambi kokuqala kwesizini, kuvele ukuthi iDikwena izodayiswa. Nokho izikhulu zayo ziphumele obala zathi leli qembu alikadayisi. Abadlali abazange baphike ngoba baveza ukuthi sebetsheliwe ukuthi iqembu lizodayiswa kodwa abangakhathazeki ngoba akukho okuzoshintsha.
“Kuyisimo esinzima ngoba sonke siyazi ukuthi kuzohlale kusemakhanda ukuthi singase silahlekelwe yimisebenzi. Iningi lethu alazi ukuthi imithetho yokudayiselana isebenza kanjani. Mhlawumbe thina badlali abadala singaba nalo ulwazi lokuthi kunemithetho ebekiwe kodwa abasebancane bazohlala bebuza kithina ukuthi kwenzekani,” kusho uMere.
“Senza okusemandleni kodwa akulula. Kuyaliphazamisa iqembu kodwa asikwazi ukukwenza izaba lokho. Ensimini sidlala ngabadlali abalinganayo namanye amaqembu. Nathi kufanele sibhukule.”