Kwamnika umdlandla ukugxekwa
UMETHULI wohlelo ama- Idols SA, uTebogo “ProVerb” Thekisho usethe akumthenanga amandla ukugxekwa ababukeli ngesikhathi eqala ethula lolu hlelo.
Le nsizwa yaseKimberly ithe yayingacabangi ukuthi ngelinye ilanga iyoba umethuli wezinhlelo njengoba yayizibona ingumculi we-hip hop kuphela.
Uthe abangani bakhe abebemgqugquzela ukuthi aye lapho kunenhlolokhono yabafisa ukwethula izinhlelo yingakho alithathela phezulu ithuba lokuyokwenza eyama- Idols.
“Ngemuva kokuqeda izifundo zami zobunjiniyela ngangizitshela ukuthi ngizosebenza ngomculo ukuze ngikhule. Kodwa abangani bami bangitshela ukuthi ake ngizame njengoba kwase kuvuleke isikhala kufuneka umethuli kuma- Idols,” kuchaza uProVerb.
Ngesikhathi eyokwenza inhlolokhono uthe uGavin Wratten, onguphrojusa wohlelo asebebambisene naye ekukhiqizeni uhlelo, wamncoma ngekhono alikhombisile.
“Ngesikhathi sengilinde ukubizwa abangani bami bangiphoqa bathi angibuke umethuli walolu hlelo waphesheya kwezilwandle ukuze ngimlingise. Nami ngenza kanjalo lokho kwangibeka la ngikhona manje,” kusho uProVerb.
Uthe kuningi akufunde kulolu hlelo njengoba esenza izinto eziningi kulona.
“Ngingomunye wabantu abathatha izinqumo ezibalulekile ohlelweni. Ukubekezela ngesikhathi ngifika kulo abantu bebuza umethuli owayeshiyile, bengigxeka bethi ngiyisidudla akungidikibalisanga kodwa ngoba ngase ngazi ukuthi ngiphokophele kuphi,” kuchaza uProVerb.