Sihlukumeze umphakathi isikweletu sikagesi
KUCISHWE ugesi esikhungweni sikahulumeni eNkandla ngoba umasipala ungawukhokhile uR21 000 obuwukweleta u-Eskom.
IThusong Community Centre, okuyisikhungo sikamasipala esinamahhovisi amaningi kahulumeni okubalwa nesiteshi samaphoyisa, ihhovisi loMnyango wezaseKhaya namanye, sekuphele amasonto amathathu singenawo ugesi.
Umphakathi awukwazi ukufonela amaphoyisa ngenxa yokuthi izingcingo zakhona zisebenza ngamandla kagesi. Amaphoyisa asebenza ebusuku akhanyisa amakhandlela. Iphoyisa elingagunyaziwe ukukhuluma nabezindaba lithe basebenza begadile ukuze bangahlaselwa baphucwe izibhamu.
“Abantu ababika ubugebengu kumele bazifikele mathupha esiteshini ngoba izingcingo azisebenzi. Okubi asazi ukuthi kungani umasipala ungakhokhi ngoba umnyango wethu ukhokha irenti kwamasipala,” kusho iphoyisa.
Ehhovisi loMnyango wezaseKhaya nakhona akusetshenza ngoba amakhompyutha asebenza ngogesi. Umthombo waleli phephandaba osehhovisi uthe umphakathi ucabanga ukuthi yibona abavilapha ukusebenza.
“Ugesi wavalwa ngo-Okthoba14 umasipala awuthi vu ngokuthi kungani ungavulwa. Abakwa-Eskom bathi bawucisha ngoba kungakhokhiwe. Akuqali ukuthi kucishwe ugesi noma amanzi kule ndawo. Amahhovisi ethu ayenzelwe ukusondezela umphakathi izidingo, kuyinkinga uma ezovulwa kodwa angasebenzi,” kusho umthombo.
ULt Col Thulani Zwane okhulumela amaphoyisa uthe bayazi ukuthi ugesi awukho kule ndawo futhi sekunesikhashana ungekho.
“Ngeke ngiphawule ngokuthi kungani ugesi ungekho ngoba udaba oluthinta umasipala. Sinxusa umphakathi usibekezelele i-generator izolethwa maduze,” kusho yena.
UMnuz Cyril Mncwabe ophethe amahhovisi oMnyango wezaseKhaya uthe banamahhovisi amabili eNkandla, umphakathi ofuna usizo bawudlulisela edolobheni, eNkandla njengoba ugesi ungekho. Uthe umasipala okumele ubuzwe ngokuthi kungani ugesi ungekho kulesi sikhungo.
Imenenja kamasipala eNkandla, uMnuz Langelihle Jili, uthe bebengazi ukuthi ugesi ucishiwe bebecabanga ukuthi kunenkinga ekuphakelweni kwawo kule ndawo.
“Besilokhu sifona sicela ukuthi abazowulungisa. Ngize ngezwa ngoLwesithathu ukuthi bawuvalile ngoba singakhokhile. Uma ngibuza ukuthi incwadi yesikweletu bayithumele kuphi bangitshela ikheli okungelona,” kusho yena.
Uthe isikweletu sabo kwa-Eskom esingu-R21 000 sebesikhokhile. Uxolise kakhulu emphakathini wathembisa ukuthi leli phutha ngeke liphinde lenzeke.
Izolo ntambama ugesi ubungakabuyi kulesi sikhungo kanti uJili uthe akazi ukuthi kwenziwa yini ngoba sebekhokhile.