Kuhlehliswe amacala kuphela ugesi enkantolo
KUHLEHLISWE amacala eNkantolo yeMantshi eNtuzuma ngenxa yokuphela kukagesi okuthiwa uphele ngoMsombuluko ntambama.
Kuthiwa abasebenzi bale nkantolo bafike ngoLwesibili ungekho ugesi kule nkantolo.
Umthombo ongaphakathi enkantolo ocele ukuthi igama lawo ligodlwe uthe bafike emsebenzini ekuseni ugesi ungekho kodwa kuze kube manje abachazelwa ukuthi ucishwe yini.
“Sifike ekuseni ngoLwesibili ugesi uphelile. Siqale ukusebenza kumnyama, sazitshela ukuthi mhlawumbe uhambile isikhashana ugesi usazobuya. Awuzange ubuye futhi asichazelwanga lutho ngokuhamba kwawo,” kusho lo msebenzi. Uthe kusukela uphelile ugesi bebelokhu besebenzisa amaselula ukukhanyisa uma besenkantolo.
Uzwakalise ukukhathazeka ngokuqiniswa kwezokuphepha njengoba eveze ukuthi banovalo lokuthi kungenzeka kweqe iziboshwa ezisuke zilethelwe ukuzothetha amacala azo. Uthe leya nkantolo inejeneretha kodwa ayisebenzi njengoba kuphele ugesi. Uthe bathole ukuthi iphelelwe uphethiloli. Okhulumela uMnyango wezoBulungiswa nokuHlunyuleliswa kweziMilo kuzwelonke uMnuz Mthunzi Mhanga ukuqinisekisile ukuthi ugesi uhambile kule nkantolo kusukela ngoMsombuluko ngemuva kokuqhuma kwe-transformer kagesi eseduze kwalapho kwakhiwe khona inkantolo. Uthe kufonelwe uMasipala weTheku ukuthi uzoyibheka indaba kagesi wathembisa ukuthi uzokwazi uku-oda amaphathi adingeka ukulungisa i-transformer engakapheli amahora angu-48.
Uthe amacala ayahlehliswa ngenxa yezimo ezingezinhle okusetshenzwa ngaphansi kwazo.UMhanga uveze ukuthi i-generator yasenkantolo yafa ngo-2015 kanti lokhu kwabikwa kuMnyango wakwaPublic Works okuyiwo okumele uyilungise kodwa waveza ukuthi udaba lwayo alusheshi ngoba inkantolo ayincikile kuyo ukuze isebenze.