Uzidlela amahlanga kwesokuhola eKZN
UZIDLELA amahlanga KwaZulu-Natal kwesokuhola i-ANC ngoDisemba uDkt Nkosazana Dlamini Zuma (osesithombeni) osephakanyiswe amagatsha amaningi.
Ngokwezibalo ezikhishwe yi-ANC izolo, uDkt Dlamini Zuma uthole amavoti amaningi njengoba esephakanyiswe amagatsha angu-247 uma kuqhathaniswa nangu-69 aphakamise imbangi yakhe uMnuz Cyril Ramaphosa.
Kwenzeka lokhu nje kusaqhubeka ukuhlala kwemihlangano yamagatsha kuphakanyiswe abaholi. Lolu hlelo kulindeleke luvalwe emasontweni amabili azayo.
EThekwini amagatsha angu-57, kwangu-110 asehlalile akhetha uDkt Dlamini Zuma.
URamaphosa usekwa emagatsheni amancane okuyiseBaqulusini, lapho ephakanyiswe amagatsha angu-16, ayisikhombisa aphakamisa uDkt Dlamini Zuma, kwathi amabili aphakamisa uDkt Zweli Mkhize.
Emalahleni batshengise ukweseka uRamaphosa eqokwa amagatsha angu-13 kwathi ayisithupha akhetha uDkt Dlamini Zuma.
UDkt Dlamini Zuma usekwa amagatsha amakhulu okubalwa iMoses Mabhida lapho kusahlale khona angu-60, eyodwa yaphakamisa uRamaphosa.
Okhulumela i-ANC, uMnuz Mdumiseni Ntuli uthe iMpumalanga izokuba nerali ekupheleni kwale nyanga okuzobe kwesekwa kuyo uDkt Dlamini Zuma.
Abeseka uDkt Dlamini Zuma beseka uSihlalo waseMpumalanga uMnuz David Mabuza njengephini likamengameli ebuholini bukaDkt Dlamini Zuma.
IMpumalanga ingeyesibili ngobukhulu kwi-ANC kanti abanye abaholi okuthiwa bazobe besezikhundleni eziphezulu uma kuthatha uDkt Dlamini Zuma kubalwa uMnuz Nathi Mthethwa, ozoba ngusihlalo kazwelonke, uMnuz Ace Magashule ozoba ngunobhala, uNksz Jessie Duarte iphini likanobhala kube noNkk Nomvula Mokonyane umgcinimafa.
“Indlela inzima kodwa isiyacaca. Uma kungukuthi uRamaphosa uyawina sizomeseka,” kusho uNtuli.
Nakuba kunamagatsha akhala ngokuthi eThekwini kube nezinto ezingahambanga kahle ngesikhathi kunemihlangano yamagatsha, kodwa uNobhala uMnuz Bheki Ntuli, uthe basathole isimangalo esisodwa kuwadi 35, eMhlanga.
Uthe amalungu kumele afake izimangalo engakapheli amahora angu-48 kudlule umhlangano.