Izinhlelo zokuvala irenki lezigemegeme
UHLONGOZA ukuvala ukusebenza kwerenki yamatekisi ahamba amabanga amade eMnambithi uNgqongqoshe wezokuPhepha KwaZulu-Natal, uMnuz Mxolisi Kaunda.
Izolo, uNgqongqoshe uye eMnambithi emuva kokuba kushone abantu abangu-11 ngoLwesibili kudutshulwa usomatekisi.
Yize bese kuthiwa sebengu-12 asebeshonile kubuye kwavela ukuthi akunjalo, olimele usesimweni esibucayi egunjini labagula kakhulu esibhedlela.
Okhulumela umnyango, uMnuz Kwanele Ncalane uthe uNgqongqoshe wenze izethulo kwikhabinethi ngezifiso zokuqinisekisa ukuphepha erenki yaseMnambithi. “UKaunda uphakamise ukuba kusetshenziswe isigaba 91esingaphansi komthetho, iLand Transport Act. Ngaphansi kwalesi sigaba wuhulumeni oqinisa ezokuphepha erenki, uhlu lwamagama abantu abasebenza imizila lugcinwa kwi-data base. Uhulumeni uba nelungelo lokuvala irenki uma kunesidingo. Uma ikhambinethi yeseka leso siphakamiso kobe sekulandelwa imiyalelo yomthetho ukwenza lokhu,” kusho uNcalane.
UKaunda kuthiwa uhlangane nethimba lamaphoyisa nabaphenyi becala izolo, unethemba lokuthi kuzoboshwa abasolwa maduze.
UNcalane uthe uma kuvalwa irenki ososeshini abazothinteka yiSizwe ne-Klipriver.
Usomatekisi obulewe ngoLwesibili, uMnuz Muzikayifani Ngobese, ubeyiphini likasihlalo kusoseshini Klipriver. Kusolwa ukuthi ukubulawa kwakhe kumayelana nezikhundla, yizimvume zokusebenza kanye nombango wezimila.
Kwenzeka lokhu nje uNcalane uthe amaphoyisa aphenya amacala angaphezu kuka-10 okubulawa kwabantu enzeke ngo-Septhemba nonyaka athinta umbango wamatekisini eMnambithi.
Umthombo osebenza erenki ukhale ngokudembesela kukaKaunda ngalesi simo ababhekene naso.
“Amanzi angenile endlini asazi manje iyoxazululeka kanjani le mpi ngoba uNgqongqoshe wabikelwa ngaphambi kokufa kwabantu. Manje uMnyango usufuna ukunyakaza. Asazi ukuthi ukunyakaza kwabo kusazosebenza yini njengoba sekonakele kakhulu embonini,” kusho umthombo.
Kuthiwa abanye osomatekisi bacashile selokhu kwenzeka lesi sigameko. UNcalane uthi angu-60 amatekisi aboshiwe okutholakale ukuthi awanazo izimvume zokulayisha abantu. UKaunda izolo uyile kobona lawa matekisi. Kuthiwa umkhankaso wokukhuculula amatekisi angenazimvumo uzoqhubeka. Amaphoyisa omgwaqo nawobugebengu kuthiwa atshaliwe eMnambithi kuze kube kudlula imilindelo nemingcwabo yabashonile. Abashonile: - UMzikayifani Ngobese, Nosipho Ngobese, Mthembeni Mkhize, Ayanda Ngcobo, Buyani Gama, Khethenjani Thwala, Zandile Dlamini, Bonisiwe Ziqubu, S.M Mavimbela, Sane Msimango nomunye obengakadalulwa.