Kutholwe isidumbu sengane yomfana siphoswe emfuleni
KUFUNWA umndeni womfana isidumbu sakhe esitholakale ngoMsombuluko siphoswe emfuleni oHlanga eThekwini, sinamanxeba okugwazwa.
Umfana oneminyaka elinganiselwa kwewu-11, isidumbu sakhe sitholwe emfuleni ngasebhulohweni uM41 ngaseMhlanga ngoMsombuluko ntambama. Kuthiwa sibonwe ngomunye wabadobi, obikele amaphoyisa. Ngaphandle kwamanxeba okugwazwa kuthiwa ubesikwe intamo.
Okhulumela amaphoyisa KwaZulu-Natal, uCaptain Nqobile Gwala, izolo uthe akukaveli muntu ohlobene nomufi.
“Isidumbu sakhe sitholakale sesiqala ukonakala. Asikaziwa isizathu sokubulawa kwakhe. Amaphoyisa aseDurban North aphenya icala lokubulala. Akukaboshwa muntu okwamanje,” kusho uCaptain Gwala.
Kuthiwa amaphoyisa nabophiko lokutakula bafike ukuzolanda isidumbu babona kamuva ukuthi sisikwe intamo.
Kusolwa ukuthi umfana ubesanda kubulawa ngoba isidumbu bekuyima siqala ukonakala.
Akukacaci ukuthi ubulawe eduze kwalapho atholakale khona yini noma uphoswe esevele esebulewe kwenye indawo. Kuthiwa nasemhlane ubesinezibazi zokushaywa.
Isidumbu sifakwe emakhazeni kahulumeni ePhoenix kusalindwe umkhondo womndeni womfana.
Kucelwa ukuthi abalahlekelwe yingane yomfana baxhumane namaphoyisa aseDurban North ukuyobona isidumbu.
Kucelwa nonolwazi ngokubulawa komufi noma owazi umndeni wakhe ashayele amaphoyisa ku-031 560 8004 ngezikhathi zomsebenzi.