Azophela amahlathi ezinyangeni mbumbulu
AZOPHELA amahlathi kubelaphi bendabuko abangenazitifiketi njengoba kusukela ngonyaka ozayo umkhandlu wabelaphi uzoqinisa imithetho.
Lokhu kushiwo nguMnuz Sazi Mhlongo onguMengameli weSouth African Traditional Healers Association, othe bakhathele ukuphoxeka ngenxa yezinyanga mbumbulu. Ubephawula nge-video esisabalele kuWhatsApp eveza owesifazane ehayiza, enqunu kwesingezansi, evula imilenze sengathi uyasha esithweni sakhe sangasese. Le video kukholakala ukuthi yaqoshwa lapho kudayiswa khona imithi yokwelapha ngasemakethe eThekwini.
Lo wesifazane ubonakala eseduze kokusasigodlo, ekhahlela imithi nezinkamba. Kubonakala owesilisa eqoqa izimpahla zakhe kulesi sigodlo, eqoqa icansi nemithi esichitheke phansi. Abanale video bathi lo wesifazane wasebenzisa umuthi awunikwa umelaphi emgwaqweni.
UMhlongo uthe bayazi ngezinyanga mbumbulu esezigcwele imigwaqo eThekwini, ezikhangisa ngemithi yokwelapha. “Besisemhlanganweni womkhandlu sikhuluma yona le ndaba yezinyanga mbumbulu. Inyanga ayikaze ihambe izincoma ngomuthi wayo kodwa abantu bayazizela ngoba bezwe ngabasizwe iyona.” Uthe ngonyaka ozayo ayikho inyanga ezovunyelwa ukwelapha ngaphandle kwesitifiketi futhi ingaziwa emkhandlwini wabelaphi. Uthe lena yindlela yokuqeda izinyanga mbumbulu. Uveze ukuthi ngisho unikwe yinyanga umuthi ongasizanga, iyona futhi okumele ikunikeze ozoqeda inkinga.
UDkt Bongani Nxumalo uthe abantu kumele bagweme ukuthenga noma yimuphi umuthi emgwaqweni. Ugcizelele ukuthi noma yini engena emzimbeni ingahloliwe idala umonakalo. “Umuthi uya esibindini esikhiqiza amakhemikhali angalimaza umzimba. Ungazibona usulunywa emzimbeni, kulimale izinso, uphoyizeni uye ebuchosheni. Umuntu angagcina ephambana ekhanda ngenxa yophoyizeni ongene ebuchosheni.”
Ezinye izimpawu zokuphuza umuthi ongafanele uthe ukuhlanza igazi, okungagcina kuholele ekufeni. Uthe isibindi siphethe impilo yomuntu, yingakho kungamele singenwe okungafanele. Uveze nokuthi sikhiqiza nama-homorne kwabesilisa nabesifazane, okungaphazamisa nezitho zangasese uma singenwe umuthi ongafanele. Uxwayise nangokugcoba noma yini edayiswa emgwaqweni okungadala ukuluma nezilonda.