‘Sizoqoka iphoyisa kwesikakhomishana’
UMENGAMELI Jacob Zuma uthe uzomemezela uma sekuphothulwe uhlelo lokuqoka ukhomishana wamaphoyisa kuzwelonke njengoba ethe uzoqoka umuntu oyiphoyisa.
UZuma obephendula imibuzo ePhalamende eKapa izolo uthe uzokwenza lesi simemezelo uma sekuphothulwe lonke uhlelo lwangaphakathi.
“Uhlelo lokuqoka ukhomishana wamaphoyisa luyaqhubeka, ngizimisele ukumemezela uma seluphothuliwe,” kusho uZuma ephendula umbuzo womholi weFF Plus uMnuz Pieter Groenewald.
Uthe ngo-Okthoba 24, uNgqongqoshe wezamaPhoyisa udedele izibalo zobugebengu ezweni washayela ihlombe umsebenzi owenziwe ngamaphoyisa ukwehlisa ubugebengu.
UZuma uthe ubuphofu obubhekene nabantu abamnyama bazalwa wumbuso wobandlululo owawucindezele abantu.
“Abantu abamnyama bahlukunyezwa wubandlululo. Ubandlululo yilona olwadala zonke izinkinga ezweni. Kungani uvikela umbuso wobandlululo?” kusho uZuma ebuza umholi we-DA uMnuz Mmusi Maimane.
Uthe uNgqongqoshe wezeNhlalakahle yomphakathi uNksz Bathabile Dlamini uzama ukuxazulula indaba yezimpesheni.
“Ngihlanganile noNgqongqoshe weziMali (Malusi Gigaba) okumanje uzama ukuhlanganisa abeposi noMnyango wezeNhlalakahle ukuze kulungiswe ubudlelwano phakathi kwalezi zinhlaka. Sizama ukuthola isixazululo kulolu daba. Ngizomxosha kanjani uNksz Dlamini njengoba inkantolo yakhipha umyalelo wokuthi akalungise indaba yokukhokhwa kwezimpesheni?” kusho uZuma.
Uthe akakaze athole mali eceleni njengoba kunemibiko yokuthi uthola iholo nyanga zonke selokhu aba ngumengameli.
Ubuzwe uMaimane ukuthi kunezinsolo zokuthi uthola u-R1 million ngenyanga komunye wosomabhizinisi baseThekwini.
“Angikaze ngithole mali kubantu abaseceleni ngaphandle kwaleyo eyaziwa yiPhalamende,” kusho uZuma.
Ebuzwa ngamalungu ePhalamende ukuthi ngabe yimpendulo yakhe yokugcina yini ukuthi akakaze athole mali uZuma uthe akakaze.
Uthe usasho namanje ukuthi uzimisele ukusungula ikhomishini ezophenya izinsolo zokulawulwa kombuso yidlanzana.
Ebuzwa ngendaba yesivumelwano senuzi, uthe izwe liphuma esikhathini esinzima sokucinyelwa ugesi wathi abafuni lesi simo siphinde senzeke.
Uthe maduzane uzomemezela ngezinhlelo ezithinta abafundi emanyuvesi njengoba kubhekwe ngabomvu umbiko wemfundo yamahhala emanyuvesi angakawudedeli.
Uqhube wathi awukho umnotho owile njengoba kuphethe i-ANC.
I-DA idube yaphuma ePhalamende ngemuva kokuba uZuma engawuphendulanga umbuzo wokuthi malini aseyichithe ngokugijimela ezinkantolo uma amaqembu aphikisayo emangalile.