Kulindelwe izi
ABENKUNDLA okuhlale kwenziwa kuyo imicimbi kamaskandi, iCurries Fountain, eThekwini, sebelivulile ithuba lokwenza imicimbi kule nkundla.
Oyisikhulu senkundla uRonnie Govender uthe bathathe isinqumo ngemuva kokuhlangana nabagqugquzeli nabanye abathintekayo ekuhlelweni kwemicimbi. “Sasingayivalile kodwa sasiyimisile ngoba sisafuna ukuthola isu lokunqanda ukubulalana kwabantu uma kunemicimbi. Sahlala phansi saqhamuka namasu angenza kube nokuthula. Okwenza kwaba lula ukuvumela imicimbi kamaskandi ukuthi sathola ukuthi abaculi sebekhumelene umlotha phambi kukangqongqoshe namakhosi,” kusho uGovender.
Uthe ngalo Mgqibelo kunomcimbi ozoba khona obizwa ngeKhuphuka NeKhuphuka Nezakho Sibone Inkunzi eCurries Fountain. Emcimbini kuzocaca ukuthi yimuphi umaskandi olandelwa yizinkumbi zabalandeli phakathi kukaKhangelani “DubulaSoDubulana” Mhlongo woSaziwayo noKhuzani “Ndlamlenze” Mpungose. Umculi ozotheleka ephelezelwa ngabalandeli abaningi ngokwedlulele, uzoklonyeliswa ngesamba sikaR100 000. Okwenza amehlo athi njo kubalandeli bakaKhuzani nabakaDSD Amageza Amahle asehoshe imfe ngenxa yokungaboni ngaso linye nomhleli womcimbi uNgelo V, kubangwa imali ayiwina nyakenye. Omunye umculi olandelwa yizinkumbi kodwa osehoxile nguMthandeni ‘Igcokama Elisha’ Manqele, naye okhale ngokungavumelani noNgelo V ngemali yokuqashwa. AbakaMjikijelwa babukeka bengakhuthele njengabakaDSD nabeNdlamlenze. U-DSD neNdlamlenze bebengamathe nolimi njengoba beqopha ndawonye enkampanini, Izingane Zoma futhi bese behlale beqopha ndawonye baziwa ngokuthi Izikhondlakhondla