UMfiliseni ufuna ukufukula umculo
UMAKADEBONA womculi kamaskandi, uMfiliseni “Mqabulasheshe” Magubane, uthe akakujahile ukuphumela ngaphandle kwakuleli nomculo wakhe.
“Ngifuna ukuhlakula eNingizimu Afrika ize ihlanzeke kuqala ngoba akukenziwa okwanele ukufundisa ngokuthi umculo kumele uthengise. Ngaphandle bazokuthanda kodwa uma ubuya ufice ukhula lukulindile. Maningi amaqembu amakhulu aya ngaphandle kodwa abuye kuleli izinga liphansi,” kusho uMqabulasheshe.
Ukhuluma kanjena nje, yena noMzo “Jaiva Zimnike” Khenyeza basanda kukhipha iCD ehambisana neDVD yabo yokuqala. Uma behlangene bazibiza ngeZingqongqo.
IDVD iqoshwe bukhoma eK-Cap KwaMashu ngasekuqaleni konyaka.
“Kungokokuqala ukuthi kube khona iDVD eqoshwe bukhoma kumaskandi. Kwembula ikhasi elisha ngoba nami lokhu ngaba khona angikaze ngiyenze. Kufakazeleka isisho esithi umuntu ufunda aze afe. Ngijabule ngendlela emangalisayo,” kuchaza uMqabulasheshe.
Uqhube wathi iDVD inezingoma eziyisikhombisa ezidle nangomdanso kanti iCD yona inezingu-13 eziqoshwe estudiyo.
Uthe zonke izingoma baziqambele.
“Sikhuluma ngothando nangezinto nje ezenzeka emphakathini. Zimnandi futhi ziyakwazi ukulalelwa ngabantu abancane nabadala,” kusho yena.
Uthe bayafisa ukuthi abantu bawuthande umculo wabo. Uthe owabo uhlukile ngenxa yendlela abacula ngayo nangendlela abadlala ngayo isigingci.
“Sifisa ukuthola uthando, imali iyolandela. Sifisa basithande sinjengoba sinjalo ngoba lukhulu esifisa ukubenzela khona. Siyokhuliswa yibo ngokusithanda kwabo,” kusho uMqabulasheshe.