Bazokhipha i-albhamu ngokuhlanganyela
IMPUMELELO yengoma kaKing Sfiso apike kuyo uMbuso Khoza (osesithombeni) ethi Ilanga yenze bobabili bathatha isinqumo sokukhipha i-albhamu ngokuhlanganyela.
Ngonyaka odlule bakhipha Ilanga eyaphenduka intandokazi ezindaweni zobumnandi.
“Ngemuva kwaleya ngoma sithathe isinqumo sokuthi sikumise ukukhipha amaalbhamu ethu kodwa senze eyodwa ngokuhlanganyela. UMbuso ubematasa ngamahubo nami ngimatasa neminye imisebenzi yami. Size saqala ukusebenza ndawonye ngoJulayi futhi namanje sisematasa,” kusho uKing Sfiso.
UMbuso ukuqinisekisile ukuthi bapheka i-albhamu noKing Sfiso.
UKing Sfiso uthe bebefuna ukuthi i-albhamu iphume ngoLwesihlanu kodwa ngeke kusenzeka.
“Sibone ngathi sesiyiphuthuma kakhulu futhi sikholwa wukuthi izinto kumele zizenzekele futhi ngendlela. Yingakho sesikuhlehlisile ukuthi siyikhiphe ngoFebhuwari wonyaka ozayo,” kusho uSfiso.
Uthe abalandeli babo bangaphatheki kabi ngoba kunengoma ehamba yodwa abayikhiphile yokuthi balinde ngayo i-albhamu ethi Shikila. Uthe bazoqopha i-video yayo maduze.
“Ngiyathanda ukusebenza noMbuso ngoba umoya wethu uyaz wana futhi naye ufuna ukuzwa ukuthi kunjani kwi-house. Yingakho ngingabanga nankinga yokusebenza naye.”
Uqhube wathi ngemuva kokukhipha i-albhamu yabo ngokuhlanganyela ngonyaka ozayo bazophinde bakhiphe awabo ngokuzimela ngasekupheleni konyaka.
UKing Sfiso uphinde abe ngumsakazi weGagasi FM. Wethula uhlelo iGMS - Dance ngoLwesibili ngo-8 kuya ku-10 ebusuku. Uphinde enze iThe Friday Hangout ngo-7 kuya ku-10 ebusuku ngoLwesihlanu ngokubambisana noZola Zeelovin.
“Emsakazweni kuhamba kahle. Uhlelo lwangoLwesihlanu lwenza ngizame izinto engingakwazi ukuzizama ngoLwesibili ngenxa yesikhathi. Ngiyakuthanda futhi nokusebenza noZola. Ngike ngangena ngoLwesihlanu phambilini kodwa ukuba khona kwakhe kwenza umehluko.”